Maqedonia e para në rajon për cilësinë e shërbimeve gjatë blerjes

Në periudhën prej 15 maj deri 15 qershor të këtij viti, kompania hulumtuese “Heraklea” në bashkëpunim me agjencitë për blerje të fshehtë nga rajoni, dhjetëra herë me radhë ka kryer hulumtimin e saj për cilësinë e shërbimeve gjatë blerjes, me qëllim që të gjejë shtetin më të mirë në rajon.

Në studim kanë marrë pjesë gjashtë vende nga rajoni: Bosnja e Hercegovina, Mali i Zi, Kroacia, Maqedonia, Sllovenia dhe Serbia. “Blerësit sekret” kanë vizituar 800 objekte të ndryshme, siç janë sallone të makinave, banka, pompa benzine, shitore, super-markete, kompani telekomunikimi, objekte hotelierike dhe industri të shërbimit.

Në këtë hulumtim përcjell Telegrafi Maqedoni, janë analizuar pesë elemente të mirësjelljes, gjegjësisht cilësisë së shërbimeve siç janë: përshëndetja, identifikimi i nevojave/dëshira e blerësve, njohja me prodhimet, oferta e prodhimeve shtesë dhe falënderimi për vizitën, që në gjuhën angleze njihen si GUEST – mysafir (Greet, Understand, Explain, Suggest, Thank).

Sipas hulumtimeve të këtij viti, Maqedonia ka rezultate më të mira, gjegjësisht 78.95 për qind. Sllovenia është në vendin e dytë me 75.60 për qind, duke shënuar rënie prej 3.43 për qind. Serbia me 74.74 për qind është në vendin e tretë, duke shënuar rritje për 1.33 për qind, Kroacia është e katërta me 73.16 për qind, ndërsa me rezultat më të dobët janë vlerësuar Mali i Zi (70.59 për qind) dhe Bosnja e Hercegovina (56.89 për qind).

Maqedonia është e para në kategorinë e njohjes së nevojave dhe dëshirave të blerësve, ndërsa Sllovenia është e para në kategorinë e ofertës së prodhimeve shtesë dhe falënderimit. Bosnja e Hercegovina është vendi që këtë vit ka pasur rezultate më të dobëta në gjitha kategoritë.

Ndërsa nëse shikohen rezultatet e objekteve, mund të vërehet se sallonet e makinave kanë ndikuar më shumë në rezultat (93.10 për qind), ndërsa super-marketet janë vlerësuar si veprimtaritë me rezultate më të dobëta (56.75 për qind)./Telegrafi/