Mancini paralajmëron rivalët në Euro 2020: Ka mbaruar koha e mbrojtjes, Italia tani luan futboll sulmues

Trajneri i Italisë, Roberto Mancini ka thënë se skuadra e tij do të luajë futboll tërheqës, pasi ka përfunduar koha e mënyrës klasike të futbollit italian.

Mancio ishte duke folur si mysafir në një aktivitet të organizuar në Palazzo Ducale në Genoa dhe foli në një mori temash.

I pyetur për identitetin e kombëtares italiane, Mancini shprehet se mënyra e vjetër e të bërit të gjërave ka përfunduar.

Lexo po ashtu Mancini: Italia synon të fitojë Euro 2020

“Më pëlqen futbolli sulmues, e di që kemi fituar katër Kupa të Botës duke luajtur në mënyrën italiane, por mendoj se mund të luajmë sot një futboll më sulmues”, ka thënë fillimisht Mancini.

“Ditët e lojës së futbollit mbrojtës dhe kundër-sulmues kanë mbaruar”.

Mancini shtoi se ekipi kombëtar ka nevojë për dashurinë e popullit italian.

“Jemi krenarë që kemi rindërtuar dashurinë e italianëve për kombëtaren, dhe në Kampionatin Evropian në Qershor, do të përpiqemi t’i bëjmë të lumtur tifozët tanë”.

Lexo po ashtu Mancini pas shortit të Euro 2020: Grup i baraspeshuar, nuk jemi favoritë

“Futbolli është një faktor uniteti, nëse kombëtarja italiane luan mirë dhe Italia fiton, ata janë të lumtur”.

“Kur dëgjoj himnin kombëtar nga bankina, ndihem krenar dhe i lumtur që jam italian”.

“Besoj se vendi ynë është më i bukuri në botë, jetojmë në mes të bukurisë, askush nuk ka thesaret artistike dhe mjedisore që kemi”, përfundoi trajneri italian. /Telegrafi/