Malazezët kundërshtojnë investimet e oligarkut rus Oleg Deripaska

Më shumë se 2,500 banorë të Grbljasë, zona midis Budvës dhe Kotorrit, qytetet më tërheqëse në bregdetin malazez, paraqitën një kërkesë duke i kërkuar shtetit të Malit të Zi të mos lejojë që dy plazhet e tyre, Ploce dhe Trsteno, të jepen me qira për “investitorët e dyshuar të huaj”.

Së bashku me peticionin, banorët e Grbljasë i dërguan edhe një letër oligarkut rus Oleg Deripaska, i cili ndërtoi një kompleks vilash luksoze në zonë, i cili dyshohet se “ua ka vu syrin” dy plazheve të famshme, duke e paralajmëruar atë të mos i synojë ato.

“Në kohën e tanishme, me zhvillimin e turizmit, kjo natyrisht është edhe më e theksuar. Pozicioni ynë është i qartë, ne besojmë se asnjë pëllëmbë e bregdetit tonë nuk mund t’i përkasë askujt më shumë se vetvetja”, thuhet në peticion, përcjell Telegrafi.

Vendasit e Grbljasë shprehen gjithashtu se prania e oligarkut rus ndihet veçanërisht në tenderët për marrjen me qira të plazheve të organizuara nga kompania shtetërore Morsko Dobro Crne Gore, të cilës Deripaska i përgjigjet me “oferta përrallore” dhe malazezët nuk mund t’i përballojnë këto oferta.

Ata deklarojnë se u janë drejtuar ambasadave të vendeve të Bashkimit Evropian, Shteteve të Bashkuara dhe Britanisë së Madhe për ndihmë.

Manjati rus Oleg Deripaska është një person i urryer në mesin e malazezëve, pasi kompania e tij CEAC nga viti 2005 deri në 2009, ishte kompania më e madhe në Mal të Zi.

Në atë periudhë, Qeveria e Malit të Zi garantoi një kredi 132 milionë euro, të cilën rusët kurrë nuk e shlyen, kështu që garancitë u paguan nga qytetarët malazez. /Telegrafi/