Pa ngjyra të forta, pa shumë shkëlqim – vetëm rafinim, qetësi dhe finesë
Çdo vjeshtë sjell një ritëm të ri – pas ditëve të qeta verore, ngadalë kthehemi drejt toneve më të ngrohta, teksturave të buta dhe elegancës që nuk ka nevojë të bërtasë. Këtë sezon, luksin nuk e përcaktojnë detajet që bien në sy, por nuancat që frymojnë qetësi, thellësi dhe bukuri të përmbajtur.
Ndërsa pranvera dhe vera u përkisnin toneve pastel dhe eksperimentimeve të guximshme, vjeshta 2025 shënon rikthimin e klasikes në formën e saj më të sofistikuar, manikyr që duket i shtrenjtë, i kujdesur dhe pa teprime.
1. Tonet e errëta që nuk janë “të zakonshme”
shutterstock
Harroni manikyrin e zi klasik. Këtë vjeshtë vendin e tij e zënë ngjyrat espresso brown dhe black cherry – nuanca që në shikim të parë duken pothuajse të zeza, por nën dritë zbulojnë ngrohtësi dhe thellësi. Këto janë ngjyra që shkëlqejnë më bukur në kombinim me bizhuteri ari dhe ton lëkure të ngrohtë. Duken veçanërisht elegante në thonjtë e shkurtër dhe të rrumbullakët - manikyr i tillë është i thjeshtë, por rrezaton besim dhe forcë të qetë, transmeton Telegrafi.
2. “Cashmere beige” – përkufizimi i ri i neutralitetit
shutterstock
Minimalizmi është rikthyer, por në një version më luksoz. Nuancat si cashmere beige dhe mushroom taupe janë bërë sinonim i elegancës së heshtur, asaj që nuk bie menjëherë në sy, por ndjehet. Këto ngjyra kujtojnë palltot e buta prej kashmiri, shallet e mëndafshit dhe tonet natyrale të lëkurës. Rezultati është më i bukur kur mbi to shtohet një shtresë e tejdukshme me shkëlqim të butë, që jep efektin e mëndafshit delikat. Duart duken të kujdesura, ndërsa pamja e përgjithshme – luksoze dhe e rafinuar.
3. Detaje metalike – por të përmbajtura
shutterstock
Manikyri metalik nuk është zhdukur kurrë plotësisht, por këtë vjeshtë ai vjen në një version më të butë dhe të ndriçuar me dritë të lehtë. Në vend të nuancave të ndezura dhe reflektuese, në trend janë satin chrome dhe sedefet e heshtura – llaqe që duken sikur janë mbështjellë me dritë të butë. Ngjyrat argjend e hirtë, shampanjë dhe ari i errët janë kthyer në të preferuarat e femrave që ndjekin modën, pasi bashkojnë modernen me klasiken – mjaftueshëm tërheqëse për t’u vënë re, por gjithmonë elegante.
4. Bordo në një formë të re
shutterstock
Si çdo vjeshtë, bordoja kthehet në qendër të vëmendjes por këtë herë në një formë të re. Në vend të tonit klasik të verës së kuqe, në fokus janë nuancat me nënton vjollce ose bronz. Këto variante shtojnë thellësi dhe elegancë, duke i bërë duart të duken të kujdesura dhe të hijshme edhe pa unaza apo bizhuteri. Një burgundy manikyr është si një aksesor i vogël më vete – i thjeshtë, por me ndikim.
5. Mikrotrend: “Quiet gloss”
shutterstock
Një nga mikrotrendët më interesantë të vjeshtës 2025 është ai që nuk dëshiron të dallohet – quiet gloss. Është manikyri që duket pothuajse natyral, por me përfundim perfekt dhe shkëlqim elegant. Kombinohet lak transparent me një nuancë shumë të butë bezhi dhe shkëlqim të lartë, duke krijuar ndjesinë e luksit pa ngjyrë. Ideal për të gjitha ato që adhurojnë estetikën “clean girl”, por duan që duart e tyre të duken sofistikuar dhe të kuruara.
Luks në heshtje
Vjeshta 2025 është stinë e elegancës së qetë, ku manikyri bëhet zgjatim i stilit personal, jo aksesor që dominon. Pa shumë shkëlqim, pa shumë ngjyrë, vetëm tone të përzgjedhura me kujdes që përcjellin qetësi dhe shije. Në një kohë kur gjithçka bëhet më e shpejtë dhe më e zhurmshme, bukurinë tani e përcakton ajo që është e thjeshtë, e përmbajtur dhe e qetë. Dhe pikërisht për këtë arsye, manikyri i kësaj vjeshte duket luksoz, sepse nuk përpiqet të jetë. /Telegrafi/
