Luiza Gega dhe Izmir Smajlaj fitojnë medaljet e arta në kampionatin ballkanik në atletikë  

Atletet shqiptarë, Luiza Gega dhe Izmir Smajlaj kanë fituar përsëri medalje të arta në disiplinat që ata përfaqësojnë në atletikë.

Luiza Gega shpallet kampione në garën e 3000 metrave në turneun e sallave të mbyllura që u zhvillua në kryeqytetin e Turqisë, Stamboll, duke e kaluar e para finishin me kohën 9 minuta e 6 sekonda.

Atletja shqiptare e distancave të mesme rrëmbeu medaljen e artë në këtë disiplinë, ku shfaqi superioritetin ndaj rivaleve të saj.

Lexo po ashtu Atletja shqiptare Luiza Gega synon kualifikimin në finale në Londër

Ky është një tjetër sukses i madh i arritur nga atletja shqiptare në turneun ballkanik “Istanbul Indoor”, teksa një vit më parë në të njëjtin turne rrëmbeu medaljen e artë në garën e 1500 metrave me kohën 4:06:65, që është edhe rekordi kombëtar në këtë disiplinë.

Tjetër medalje e artë për Shqipërinë në kampionatin ballkanik të sallave të mbyllura që po zhvillohet në Stamboll të Turqisë u fitua edhe nga meshkujt.

Lexo po ashtu Izmir Smajli shpallet kampion Evrope në Beograd (Video)

Pas Luiza Gegës, që fitoi të artën në garën e 3000 metrave me kohën 9 minuta e 6 sekonda, në shkallën më të lartë të podiumit u ngjit edhe Izmir Smajlaj.

Atleti shkodran i kërcimit së gjati kërceu 7 metra e 80 centimetra, duke mbrojtur titullin kampion që fitoi një vit më parë në Beograd.