Trajneri i Paris Saint-Germain, Luis Enrique, iu desh t’i nënshtrohej një ndërhyrjeje kirurgjikale urgjente në klavikulën e tij pasi u përfshi në një aksident të premten kur ra nga biçikleta e tij.
Enrique është një çiklist i apasionuar dhe shpesh merr pjesë në gara amatore.
Të premten, ai u rrëzua nga biçikleta dhe theu klavikulën, dhe u dërgua me urgjencë në spital për një operacion në klavikulë.
"Klubi shpreh mbështetjen e tij të plotë dhe i uron atij shërim të shpejtë. Informacione të mëtejshme do të publikohen në kohën e duhur", shkroi PSG në një deklaratë.
Për momentin, nuk ka informacione më të detajuara rreth aksidentit dhe koha standarde e rikuperimit për një klavikulë të thyer është gjashtë deri në tetë javë.
Për shkak të kësaj, është e pasigurt nëse Enrique do të jetë në stolin e PSG-së në ndeshjet e ardhshme.
Pas pushimit ndërkombëtar, parisienët kanë një ndeshje kundër Lens, dhe më pas sfidën e parë në Ligën e Kampionëve kundër Atalantas. /Telegrafi/
