Lojtarët po shkëlqejnë te Barcelona para El Clasicos, por Hansi Flick veçon njërin më shumë

Real Madridi pret Barcelonën në Santiago Bernabeu në El Clasicon e parë të sezonit në kampionatin spanjoll të shtunën, me fillim nga ora 21:00. Për momentin, Blaugranasit kanë tri pikë epërsi ndaj madrilenëve.

Nga ana tjetër, skuadra latalunase, ​​e cila po duket e mrekullueshme këtë sezon, ka shanse të rrisë avantazhin e saj në krye të tabelës në fazat e hershme të kampionatit.

Carlo Ancelotti i dha mirënjohje trajnerit të ri të Barçës, Hansi Flick në konferencën për shtyp.

“Ai ka ndryshuar pak filozofinë, luan ndryshe, shumë më drejtpërdrejt. Nuk dua ta krahasoj punën sepse Xavi bëri një punë të shkëlqyer në mënyrën e vet te Barca, është një Barcelonë ndryshe, të cilën ne e respektojmë po aq sa atë të Xavit”, ka thënë italiani.

Që kur Flick ka qenë në stolin e gjigantëve katalanas, ekipi ka luajtur futboll shumë sulmues me një skuadër plot talente nga La Masia, duke i kënaqur tifozët dhe duke i kthyer në ditët e arta të klubit. Një nga drejtuesit e rinj të skuadrës është anësori fantastik brazilian me këmbë të majtë, Raphinha.

Barcelona shkon në Madrid pas një fitoreje të madhe kundër Bayernit në Ligën e Kampionëve, në të cilën Raphinha shënoi një het-trik. Në 13 ndeshje të luajtura, ai ka shënuar 9 gola dhe 8 asistime në të gjitha garat. Flick është plot lëvdata për yllin e tij të ri.

“Unë kurrë nuk kam pasur një lojtar si Raphinha në asnjë ekip. Njeriu jep gjithçka për lojën, lë zemrën në fushë. Si me top ashtu edhe pa top, Raphinha luan për mrekulli, ai është gjithmonë i pari që fillon të bëjë presion, krijon raste dhe ka një përfundim të mrekullueshëm, përveç kësaj, ai është gjithmonë i buzëqeshur”, deklaroi Flick. /Telegrafi/