Lista Serbe i cilëson “paushalle” deklaratat e ambasadorit amerikan për Radoiçiqin

Lista Serbe i ka hedhur poshtë pretendimet e ambasadorit amerikan në Kosovë, Jeff Hovenier për përfshirjen nënkryetarit të kësaj partie, Milan Radoiçiq, në aktivitete të paligjshëm, dhe thotë se pret nga ambasadori amerikan të “paraqesë prova të qarta për pretendimet e tij, jo vlerësime paushall”.

Reagimi I Listës Serbe vjen pasi ambasadori i Shteteve të Bashkuara të Amerikës në Kosovë, Jeff Hovenier ia kujtuar kryetarit të Listës Serbe, Goran Rakiq se vartësi i tij Milan Radoiçiq është në listën e zezë të sanksioneve të Departamentit të Thesarit.

Hovenier në një deklarim për media pas takimit të sotëm me Rakiqin është shprehur se Radoiçiq është i lidhur me grupet kriminale ndërkombëtare.

”Në deklaratën e tij për media, ambasadori amerikan ka harruar të përmend atë që ka thënë në atë takim kryetari i Listës Serbe, Goran Rakiq lidhur me pretendimet e ambasadorit, para së gjithash, se është e papranueshme të flitet për dikë në këtë në mënyrë, dhe në të njëjtën kohë për akuzat e lartpërmendura të thënë nga ambasadori amerikan, ndaj nënkryetarit Radoiçiq nuk është nisur asnjë procedurë gjyqësore për të vërtetuar atë që pretendon zoti Hovenier”, thuhet në komunikatën e Listës Serbe, përcjell Telegrafi.

Lexo po ashtu Hovenier ia kujton Rakiqit se Milan Radoiçiq është në listën e zezë të SHBA-së

Më tej Lista Serbe thotë se “në rastin e nënkryetarit tonë, është e qartë se Prishtina dhe Hovenier mendojnë se është e mundur të shpallet fajtor pa vendim gjykate”.

“Qytetarët tanë e kuptuan se një deklaratë e tillë për zotin Radoiçiq është bërë me qëllim të presionit ndaj Radoiçiqit, Listën Serbe dhe në përgjithësi ndaj popullit serb në veri në kohën kur Prishtina po ndërmerr aksione të njëanshme dhe terrorizon popullin duyarthatë. Këto deklarata nuk do ta zbehin vendosmërinë e tyre për të mbijetuar dhe qëndruar në këto zona, duke respektuar kontributin që jep për të Radoiçiq”, thuhet në komunikatë.

Lista Serbe thotë se “është veçanërisht hipokrite kur përfaqësuesit e bashkësisë ndërkombëtare u flasin serbëve për nevojën e respektimit të Marrëveshjes së Brukselit, ndërkohë që pranojnë se formimi i Asociacionit të Komunave Serbe është i pamundur nëntë vjet pas nënshkrimit të asaj marrëveshjeje, ose kur ata flasin për respektim të drejtave dhe drejtësisë, dhe në të njëjtën ‘Kosovë e Metohi’ nuk aplikohet asnjë dokument në favor të serbëve, madje as aktgjykimi i Gjykatës Kushtetuese”.

Ambasadori amerikan në Kosovë, Jeff Hovenier, u takua sot me kryetarin e Listës Serbe, Goran Rakiq, të cilit, siç tha ai, ia rikujtoi qëndrimet e SHBA-së për disa çështje, përfshirë edhe atë për nënkryetarin e kësaj partie, Milan Radoiçiqin, i cili është në listën e të sanksionuarve të Departamentit të Thesarit të SHBA-së.

Takimi i 4 gushtit u mbajt pas ngjarjeve të ditëve të fundit në veri, ku më 31 korrik, serbët lokalë vendosën barrikada në dy rrugët që çojnë për në pikat kufitare – Jarinjë dhe Bërnjak – që lidhin Kosovën dhe Serbinë. /Telegrafi/