Lippi: Futbolli duhet të rifillojë – po dërgojmë sonda në Mars e nuk po gjejmë vaksinë për coronavirusin

Marcello Lippi ka reaguar ndaj mënyrës së trajtimit që po i bëhet futbollit duke thënë se sezoni në Serie A duhet të rifillojë sa më shpejt që është e mundur.

Protokolli mjekësor për të cilin u pajtuan Federata e Italisë dhe Qeveria e atjeshme, u refuzua menjëherë nga klubet italiane dhe Shoqata e futbollistëve, prandaj pritet të shihet se a do të rifillojnë stërvitjet grupore ditën e hënë.

“Situata që po e përjetojmë më bën të vjell, vërtet më tërbon. Çdo ditë po dëgjojmë se jemi të gjithë bashkë në këtë, ndërsa më pas secili bën çfarë dëshiron, si në aspektin shkencor, ashtu edhe në atë politik”.

“Jemi në vitin 2020, mund të dërgojmë sonda në Mars, ndërsa nuk mund të gjejmë një vaksinë për coronavirusin?”.

“Pse të mos e lejojmë futbollin të rifillojë? Nuk është më si para dy muajsh, kur u rrafshuam nga një cunami, tash virusi e ka humbur fuqinë dhe spitalet janë në gjendje që të organizohen”.

“Ka shumë demagogji rreth futbollit. Është një industri gjigante dhe duhet të trajtohet si e tillë”, ka deklaruar Lippi për Radio Deejay. /Telegrafi/