Ligji për Trepçën nuk përfshinë asetet e Trepçës jashtë Kosovës

Shyqri Kelmendi, anëtar i Komisionit për Trepçë dhe ekspert i fushës, ka folur në “Interaktiv” rreth Ligjit të Trepçës. Ai është anëtar i komisionit me 16 anëtarë, ku janë tre ministra aktualë dhe dy anëtarë serbë.

Ai ka thënë se Komisioni për Trepçë duhet ta mendojë rrugën e Trepçës në periudhën e parë, ku përfshihet stabilizimi i prodhimit, shkollimi i kuadrove të reja, rrumbullakimi i raportit minerar e xehetar dhe ri-përtëritja e fuqisë punëtore, transmeton Koha.net.

Sipas Kelmendit, duhet pritur ende për të ndërmarrë një koncensionim me një kompani serioze, por që për momentin dhe për disa vite të ardhshme nuk parashihet kjo lëvizje.

Kelmendi ka treguar gjithashtu se në Ligjin për Trepçën nuk përfshihet asetet jashtë Kosovës.

“Asetet që janë jashtë Kosovës nuk përfshihen në këtë ligj, por duhet të mbeten në politikat e Qeverisë së Kosovës”, ka thënë Kelmendi duke shtuar se ato mbesin nën përgjegjësi të AKP-së, por që gradualisht mund të merren edhe ato.

Kurse, në rrafshin e shumëfolur të kreditorëve, ai ka thënë se ende nuk e kanë një pasqyrë të plotë, por që brenda javës do të përgatitë AKP-ja një pasqyrë të plotë.

“Nuk kam pasqyrën e plotë të kreditorëve, brenda javës AKP ka thënë se do ta përfundojë pasqyrën e plotë. Sipas të dhënave të mia janë 20-25 kreditorë, të gjithë janë nga Serbia dhe kërkesat e tyre sillen nga 70-150 milionë euro, por unë mendoj se janë të pambuluara me ndonjë dokumentacion relevant”, ka thënë Kelmendi.

Kelmendi ka thënë se minierat duhet të kenë mendësinë e shekullit 21, duke synuar në prodhimin e metaleve që sot përdoren në teknologjinë e pajisjeve me “touch”.