LGBT Junajted Tetovë: Anëtarë të komunitetit tonë janë edhe pjesëtarë të partive politike shqiptare

Komuniteti LGBT ka reaguar ndaj një debati të mbajtur në Tv21, ku sipas tyre, janë shprehur fjalë fyese dhe diskriminuese nga një kadidat për deputet, që komunitein LGBT e ka quajtur ”devijim të shoqërisë”, njofton Telegrafi Maqedoni.

Në reagimin e Shoqatës LGBT Junajted, mes tjerash thuhet ”duam të përkujtojmë faktorin politik shqiptarë në Maqedoni se komuniteti LGBT shqiptarë në Maqedoni ekziston, ka ekzistuar dhe do të ekzistojë dhe është një komunitet i madh i cili po organizohet viteve të fundit dhe anëtaret dhe anëtarët e të cilit janë kudo dhe ushtrojnë profesione të ndryshme e mes të tjerash edhe funksione politike dhe disa nga ato janë edhe anëtarë aktivë të partive tuaja politike.

Partitë politike shqiptare në Maqedoni jo që në agjendat e tyre politike shumë pak i trajtojnë të drejtat njerëzore por edhe e injorojnë plotësisht ekzistencën e një komuniteti që numëron mijëra anëtarë. Duam të dërgojmë porosi tek faktori politik shqiptarë në Maqedoni që mos e injorojnë faktin e ekzistencës së komunitetit LGBT shqiptarë në Maqedoni dhe mos e injorojnë faktin që edhe komuniteti LGBT është faktor dhe votues potencial. Duam të rikujtojmë se gjatë viteve të fundit jo vetëm në Tetovë por edhe në Gostivar e Strugë janë zhvilluar aktivitete publike LGBT edhe pse të ftuar në të gjitha aktivitetet të njëjtët çdo herë i kanë injoruar aktivitetet tona.

Komuniteti LGBT është pjesë e traditës shqiptare sepse ne kemi ekzistuar gjithmonë por viteve të fundit jemi më të zëshëm dhe më te organizuar dhe haptas luftojmë dhe kërkojmë të drejtat tona. Kërkojmë nga faktori politik shqiptarë në Maqedoni që një herë e përgjithmonë të mos përdorë gjuhe të urrejtjes ndaj komunitetit LGBT dhe të mos përdorin komunitetin LGBT për pazaret e tyre politike. Kërkojmë që kandidatët për deputetë të përmbahen nga gjuha e urrejtës ndaj komunitetit LGBT dhe të mos shpërndajnë komente homofobike, bifobike e transfobike.”/Telegrafi/