Barcelona arriti një tjetër fitore bindëse në turneun miqësor në Korenë e Jugut, duke mposhtur skuadrën vendase Daegu me rezultatin 5:0.
Megjithatë, fitorja u zbeh nga një moment shqetësues në fundin e ndeshjes, kur mbrojtësi i ri Pau Cubarsi pësoi një dëmtim që vuri në alarm trajnerin Hansi Flick dhe stafin e tij.
Kamerat e transmetimit kapën reagimin e menjëhershëm të Flick, i cili dukej i shqetësuar dhe në mosbesim pas incidentit që përfshiu njërin prej lojtarëve më premtues të skuadrës.
Pas një kontrolli të parë nga stafi mjekësor, Cubarsi ishte në gjendje të largohej vetë nga fusha, por do t’i nënshtrohet testeve të mëtejshme për të përcaktuar shkallën e dëmtimit.
Sipas raportimeve fillestare, nuk dyshohet për ndonjë dëmtim serioz, por një goditje e fortë në gjurin e majtë mbetet arsyeja e shqetësimit. Zëvendësimi i tij u bë si masë paraprake.
Pavarësisht lëndimit të Cubarsit, Barcelona shkëlqeu në fushë. Gavi ishte protagonist me dy gola, ndërsa Robert Lewandowski, Toni Fernandez dhe Marcus Rashford shënuan nga një gol secili.
Skuadra katalanase po e përdor këtë turne për të testuar formën e lojtarëve para fillimit të sezonit të ri, ndërsa Flick po punon për të ndërtuar një ekip të qëndrueshëm dhe konkurrues. /Telegrafi/
