LDK kërkon që nesër të mbahet seancë e jashtëzakonshme për kazinotë

Lidhja Demokratike e Kosovës ka bërë të ditur se ka dorëzuar sot një kërkesë për një seancë të jashtëzakonshme për ditën e nesërme në lidhje me ngjarjet që kanë ndodhur ditëve të fundit në kazino.

Sipas njoftimit të LDK-së, ngjarjet tragjike të javës së fundit, ku në ambiente të kazinove-lojërave të fatit mbetën të vdekur dy të rinj, duket qartë se nuk janë raste të izoluara – ekziston rreziku që ngjarje të tilla të shndërrohen në fenomen.

Andaj, vlerëson LDK, mbrojtja e qytetarëve, ofrimi i sigurisë dhe ambientit të qetë janë përgjegjësi të shtetit të Kosovës.

“Prandaj, është detyrë parësore e deputetëve të Kuvendit të Republikës së Kosovës që të adresojnë me urgjencë këtë fenomen përmes seancës së jashtëzakonshme. Mos veprimi i institucioneve përkatëse shtetërore në këtë moment do ta vështirësoj adresimin e këtij problemi më vonë”.

“Lidhur me këtë, Grupi Parlamentar i LDK-së, vlerëson se është e nevojshme që Kuvendi i Republikës së Kosovës të shpreh qëndrimin e vet lidhur me këto ngjarje dhe të kërkojë nga Qeveria që menjëherë të pezullojë aktivitetet e kazinove dhe lojërave të fatit, në mënyrë që ngjarje të tilla të mos përsëritën më”.

“Duke pasur parasysh rëndësinë dhe urgjencën e kësaj çështjeje, Grupi Parlamentar i LDK-së i mbështetur nga disa grupe parlamentare dhe deputetë të pavarur, ka dorëzuar sot kërkesën për seancë të jashtëzakonshme, për nesër me datë 22.03.2019, në orën 11.00”, thuhet në njoftimin e LDK-së. /Telegrafi/