Lansohet fondi për përkrahjen e bizneseve që promovojnë inovacionin (Video)

Me qëllim të mbështetjes së projekteve që kontribuojnë në promovimin e zhvillimit të inovacionit dhe ndërmarrësisë, Ministria e Inovacionit dhe Ndërmarrësisë, ka lansuar “Fondin për Inovacion dhe Ndërmarrësi” për bizneset ekzistuese dhe ato fillestare, të cilat kanë mundësinë të marrin subvencionim deri 100 mijë euro.

Ministri i Inovacionit dhe Ndërmarrësisë, Besim Beqaj, tha se fondi ka për qëllim përkrahjen e inovatorëve që kanë për synim dixhitalizimin e ekonomisë.

“Ne sot po e bëjmë një hap drejt dixhitalizimit të ekonomisë dhe funksionalizimit shumë më të fuqishëm të programit të financimit të bizneseve fillestare [start-up] dhe ndërmarrjeve të vogla dhe të mesme në Kosovë”, tha Beqaj, shkruan Telegrafi.

Ai tha se sektori i inovacionit premton që të realizon më shumë.

“Kemi këtë sektor që është shtytësi më i madh i zhvillimit ekonomik, i cili vjen nga format që është i vetmi që ka bilanc pozitiv tregtar dhe premton që të realizon më shumë. Është një ekosistem që është duke u zhvilluar, duke pasur parasysh që investitorët janë privat dhe janë duke larguar kufij virtual shumë më shpejtë se kufinjt të tjerë”, shtoi ai.

Ministri i Financave, Bedri Hamza, tha se janë bërë disa veprime që shkojnë në përkrahje të sektorit privat.

“Janë bërë disa veprime që shkojnë në përkrahje të sektorit privat, posaçërisht duke i targetuar ato grupe që kanë më shumë nevojë për përkrahje që është gjenerata e re dhe që është gjinia femërore”, tha Hamza.

Ai tregtoi se Ministria e Financave ka liruar nga tatimi të gjitha lëndët e para që përdorën për ndërmarrjet prodhuese.

“Vendimet janë marr në favor të ndërmarrjeve prodhuese, siç dihet janë liruar nga tatimi i akcizës të gjitha lëndët e para që importohen si burime për ndërmarrjet prodhuese, janë liruar nga tatimi doganor të gjitha lëndët e para”, tregoi ai.

Lexo po ashtu Arta Zajmi fitoi medalje të artë në lojërat “Start Up” në Londër

Arta Shehu-Zajmi, drejtoreshë e “Akademia JCoders”, fituese e medaljes së artë në lojërat “Start-Up” në Londër, tha se kjo skemë e granteve do të na fuqizoj misione tona.

“Skema e granteve është një risi që potencialisht mund të na fuqizoj në misionet tona. Këtë skemë të granteve ne si komunitet i bizneseve fillestare po e mirëpresim dhe shpresoj se do të shkoj sa më mbarë”, tha Shehu-Zajmi.

Thirrja për mbështetje financiare është e ndarë në tri nivele. Në nivelin e parë është shuma për financim prej 20 mijë euro, për nivelin e dytë janë ndarë 50 mijë euro dhe në nivelin e tretë do të përfitojnë financim prej 100 mijë euro.

Gara do të qëndrojë e hapur 30 ditë që nga dita e sotme dhe linkun për aplikim mund ta gjendeni këtu.

Lexo po ashtu Lansohet fondi për përkrahjen e OJQ-ve që promovojnë inovacionin (Video)

Kujtojmë se kjo është faza e dytë e fondit, pasi që në muajin maj ishte hapur thirrja për organizatat joqeveritare që kanë për qëllim promovimin e inovacionit. /Telegrafi/