Ky burrë nga Uellsi tregon se si ai pothuajse ‘hëngri veten’ – para se të humbiste 190 kilogramë

I shtrirë në një shtrat spitali, Ioan Pollard peshonte 286 kilogramë, veshka e tij po dështonte dhe ai nuk e dinte nëse do të mbijetonte.

Në moshën 27-vjeçare në atë kohë, ai kishte nevojë për një transplant, por nuk ishte i përshtatshëm për shkak të peshës së tij.

“…Stafi i spitalit më tha se tetë orët e ardhshme ishin kritike dhe mund të mos jem më në mëngjes”, kujton Ioan.

Një muaj pas ditëlindjes së tij të 27-të, Ioani për pak humbi jetën.

Ai kishte gërvishtje në këmbë të cilat ishin kthyer në septike.

“Ishte menjëherë e qartë se veshkat e mia ishin dëmtuar rëndë”, tha Ioan, i cili jeton në Caernarfon, Gwynedd të Uellsit.

“Më thanë se gjërat nuk dukeshin mirë dhe se duhej të fillonim të flasim për dializën”.

“Madhësia dhe pesha e trupit tim nënkuptonin se nuk kisha asnjë shans për të bërë një transplant. E vërteta është se isha shumë i trashë”.

Dhe sigurisht, ushqimi ishte një shqetësim i madh për miqtë dhe familjen, veçanërisht nënën e tij.

Duke parë rrobat e tij nga një periudhë kur ato ishin blerë nga dyqanet e specializuara, beli i tij kishte arritur në mbi 180 cm.

“Unë nuk kisha vetëkontroll”, thotë Ioan, i cili është redaktori i lajmeve dixhitale të S4C. “Ushqimi kontrollonte gjithçka që bëja dhe mënyrën se si e jetoja jetën time”.

“Në atë kohë nuk e pranova që isha i varur nga ushqimi dhe po haja tepër, por, duke parë prapa, padyshim që isha”.

“Kur shikoj prapa, ndihem në siklet që kisha zgjedhur ta jetoj jetën time kështu. Vetëm tani e kuptoj se çfarë i kisha bërë vetes dhe trupit tim”.

Në një periudhë prej shtatë vjetësh, me ndihmën e operacioneve për zvogëlimin e stomakut dhe heqjen e lëkurës, ai humbi më shumë se gjysmën e peshës së tij – 191 kg – ai kishte fituar të drejtën për transplantim.

Pas kësaj, u zbulua se nëna e tij mund t’i dhuronte një nga veshkat djalit të saj.

“Dua që Ioani të jetojë jetën e tij, ai e meriton”, thotë ajo.

Ioan, tani 35 vjeç, tani shpreson për një të ardhme më të shëndetshme.

“Kam kaluar kaq shumë. Unë vetëm dua që kjo të funksionojë pa asnjë problem”, thekson ai.

“Është e natyrshme të shqetësohem më shumë për mamin sesa për veten time, sepse mamaja po e vendos veten në një pozicion të pambrojtur në përpjekje për të përmirësuar jetën time. Gjithçka varet nga kjo tani”. /Telegrafi/