Kush nuk e njeh internetin, le ta harrojë fushatën: Hillary Clinton dështon në humor! (Video)

“BILD ose televizori”. kështu thoshte një kancelar gjerman dikur. Gerhard Schröder e dinte se jo çdo gjë varet nga paraqitjet ceremoniale shtetërore. Ndërkohë, për fushatën zgjedhore në SHBA është shpallur një batutë tjetër: “Është interneti, budalla”. Kush nuk ndjek aty një linjë të qartë, le ta harrojë fushatën zgjedhore! Për këtë, Hillary Clinton, ose ndonjëra nga këshilltaret e saj, ka thënë: Duhet të bëjmë diçka. Flokëshkalafituri na e ka kaluar. Madje edhe në spektaklin “Late Night Host”, të Jimmy Fallonit, lejon t’ia prekin flokët. Tani ndihmon vetëm Zachu! Po kush është ky Zach?

Zach Galifianakis është i njohur si “Alani” në komedinë “Hangover”. Ndërkohë ai e ka kanalin e internetit “Funny or die”, të klikuar disa milionë herë në YouTube, i parë në të gjithë botën, nga një njeri që shtron pyetje të rafinuara. Justin Bieber ka qenë i ftuar aty, Brad Pitt, Bruce Willis, Charlize Theron, e Barack Obama.

Nëse Obama u paraqit shumë mirë, duke e gozhduar me fjalë moderatorin Zach, Hillary Clinton qëndron e ulur duke pranuar që të bëhen shaka në kurriz të saj. Një breshëri pyetjesh për kandidaten demokrate, por për fat të keq, shkruesit e teksteve të saj nuk kishin parashikuar asgjë që të mbante pak erë humori. Ata që e kanë dhënë OK-im për tekstin, duhet t’ia kenë dhënë vrapit në momentin, kur ajo thotë: “I really regret doing this” – vërtet jam e penduar që e bëj këtë.

A mund të quhet kjo fjali, humor?

Pasi kaluan gati dy të tretat e videos, transmetohet një klip publicitar i Donald Trumpit. Më parë Zachu e ka pyetur kandidaten, si femra e parë që mund të hyjë në Shtëpinë e Bardhë, se çfarë do të ndodhte nëse ajo mbetet shtatzënë. Clinton i ofron moderatorit disa letra, që ai të informohet për një rast të tillë. Pauzë e shkurtër. Të qeshura? Jo!

Megjithatë, videoja në YouTube rekomandohet për t’u parë, sepse Galifianakis është një mjeshtër i gjetjes së momentit të duhur. Kështu, ai bën një pauzë të mrekullueshme në prezantimin e të ftuarës së tij – Hillary… Clinton. Pauza mes dy fjalëve – dy sekonda, tre do të ishin shumë.

Në fund, Zach heq dorë si një boksier që nuk e di nëse do duhet ta godasë rivalin që në raundin e dytë apo në fund. Galifianakis pret fundin dhe përshëndetjen e largimit e fillon me një gënjeshtër: “E gjitha ishte shumë dëfryese, zonja Clinton… Duhet të mbetemi në kontakt! Cila është mënyra më e mirë për t’iu gjetur, me email?” (Ironia për shkak të aferës së saj)!