Kurti në shtëpinë muze të familjes Qerkezi: Qëndresa e nënës Ferdonije na mbanë të fortë të gjithëve

Në Ditën Ndërkombëtare të Personave të Zhdukur me dhunë, Kryeministri i Republikës së Kosovës, Albin Kurti, vizitoi shtëpinë muze të familjes Qerkezi, ku u pritë nga Ferdonije Qerkezi, Nesrete Kumnova dhe përfaqësueset e organizatës  “Thirrjet e Nënave”.

Sipas një njoftimi për media, Kurti ritheksoi se Qeveria e Republikës së Kosovës mbetet e përkushtuar për ndriçimin e fatit të të zhdukurve me dhunë gjatë luftës, për t’i dhënë fund ankthit të pritjes së familjarëve.

“Baca Halim, Artani, Armendi, Ardiani dhe Edmondi janë emra që i njohim të gjithë dhe i mbajmë në zemër. Janë emra të vuajtjes e dhimbjes, të humbjes e pikëllimit, jo vetëm të Nënës Ferdonije, por të gjithë popullit dhe secilit qytetar”, tha Kurti.

Ai tha se qëndresa e Nënës Ferdonije i mbanë të fortë të gjithëve, i ikurajon e frymëzon.

Tutje në njoftim bëhet e ditur se gjatë kësaj vizite u rikujtua edhe protesta e para 18 viteve, për zbardhjen e fatit të të zhdukurve, gjatë së cilës Kurti, atë kohë si protestues, u arrestua bashkë me përfaqësueset e organizatës “Thirrjet e Nënave”.

Sipas njoftimit thuhet se duke i falënderuar për qëndresën e tyre, Kurti shprehu mirënjohje për angazhimin e nënave nga Gjakova, të cilat protestonin edhe për lirimin e të burgosurve nga burgjet serbe dhe që vazhdojnë aktivizmin e tyre, për zbardhjen e fatit dhe të vërtetës për personat e zhdukur me dhunë gjatë luftës në Kosovë. /Telegrafi/