Kualifikohet Kosova

Përfaqësuesja e Kosovës, konkurrenca e femrave, ka regjistruar fitoren e dytë në Kampionatin Botëror të Pingpongut për Ekipe, i cili po mbahet në Kuala Lumpur të Malajzisë.

Pas fitores ndaj Mauritius, në Grupin M, vashat kosovare i mundën edhe Maldives, po ashtu me rezultat identik 3:2, për t’u kualifikuar në fazën përfundimtare.

Meçin e parë e fitoi Vlona Maloku, e cila e mundi kundërshtaren Fathimath Nimal 3:0 në sete, ndërsa pingpongistja kosovare e fitoi edhe duelin e dytë ndaj Aminath Shareef, 3:0.

Kjo e fundit e mundi përfaqësuesen tjetër kosovare, Ilirjana Haliti 3:2, kurse Haliti e humbi edhe duelin me Fathimath Nimal. Por, fitorja e Era Janjevës ndaj Aishath Nazim ishte vendimtare në fitoren e Kosovës, të dytën brenda dy ditësh.

Duhet përmendur faktin se Kosova e ka humbur duelin e parë nga Libani, 2:3.

“Është sukses që kemi arritur të kualifikohemi në fazën përfundimtare, ku do të luftojmë për vendin e parë për t’u ngritur në një divizion më lart, që do të ishte rezultati më i mirë deri më tani. Sipas gjasave, ne do të përballemi me Turkmenistanin. Gjasa kemi të fitojmë, pasi vashat tona treguan formë shumë të mirë. shpresoj të vazhdojmë kështu në këto dy ditë historike për pingpongistet kosovare”, theksoi për Zërin trajneri Besart Domaniku.

Kosova ka gjasa të mira të kalojë në divizionin e tretë nga ai i katërt, në konkurrencën e femrave.

Për dallim nga këto të fundit, meshkujt zhgënjyen në këtë eveniment duke i pësuar tri humbje në Grupin N, nga Mauritius, 1:3 në sete, nga Togo, 1:3 dhe nga Emiratet e Bashkuara Arabe, 2:3.