Kryetari i Istogut, Ilir Ferati zgjidhet edhe kryetar i degës së LDK-së në këtë komunë

Lidhja Demokratike  e Kosovës, ka mbajtur sot Kuvendin e jashtëzakonshëm zgjedhor të degës së saj në Komunën e Istogut.

Nga procesi zgjedhor, me unanimitet të plotë kryetar i degës së LDK-së në Istog u zgjodh Ilir Ferati, njëherit edhe kryetar aktual i kësaj komune.

I pranishëm në këtë proces ishte edhe kryetari i LDK-së, Lumir Abdixhiku. Abdixhiku në një postim në Facebook ka shkruar se zgjedhjet në LDK janë gjithmonë festë, por këto të Istogut na vijnë pas shuarjes së hershme të Haki Rugovës.

“Me Ilirin, kryetarin e tanishëm të komunës dhe tani kryetarin e ri të degës, rrugëtimi ynë politik për një Kosovë të drejtë e përparimtare vazhdon gjithëherë”, ka shkruar Abdixhiku.

Kryetari i sapozgjedhur i degës së LDK-së në Istog, Ilir Ferati, pasi që falënderoi delegatët për besimin e dhënë, theksoi se angazhimi dhe përkushtimi i tij do të jetë permanent, ku shtoi se LDK mbetet e hapur për profesionistë e profesioniste të të gjitha niveleve.

Në këtë Kuvend, strukturave partiake iu bë thirrje për mobilizim të vazhdueshëm në kuadër të ciklit të ri të takimeve nëpër gjithë Kosovën. /Telegrafi/