“Kosovës po i bëhet presion, por jo edhe Serbisë” – deklarata e senatorit demokrat për dialogun, kritika ndaj Vuçiqit dhe çështja e Asociacionit

Një ditë më parë u mbajt seancë dëgjimore në Senatin amerikan lidhur me situatën në Ballkanin Perëndimor, ndërsa vëmendja e veçantë iu kushtua dialogut Kosovë-Serbi.

Seancën e Komisionit për punë të Jashtme ku folën zyrtarë të Departamentit Amerikan të Punëve të Jashtme, Derek Chollet dhe Gabriel Escobar e kryesoi kryetari i Komisionit për Punë të Jashtme të Senatit të Shteteve të Bashkuara, Bob Menendez.

Senatori ka folur për dialogun Kosovë-Serbi, çështjen e Asociacionit të komunave me shumicë serbe, gjersa ka kritikuar ashpër presidentin e Serbisë, Aleksandar Vuçiq për të cilin tha se narrativën e ka të ngjashme me vizionin e Putinit.

Menendez, ndryshe senator i Partisë Demokratike nga shteti i New Jerseyt në fjalën hyrëse për negociatat ndërmjet Kosovës dhe Serbisë, ai tha se nuk beson se të gjithë akterët po veprojnë njëlloj në mirëbesim, transmeton Telegrafi.

Senatori deklaroi se “Vuçiqi po u thotë diçka tjetër liderëve perëndimorë ndërsa një gjë tjetër popullit serb përmes mediave të kontrolluara nga shteti”.

Për 69-vjeçarin, ka një ngjashmëri mes retorikës së liderit serb dhe të presidentit rus, Vladimir Putin.

Senatori amerikan shprehu shqetësimet e tij në lidhje me statutin e Asociacionit të komunave me shumicë serbe.

“Nuk ka garanci që Asociacioni nuk do të bëhet një Republika Sërpska, sikurse në Bosnjë e Hercegovinë”, paralajmëroi Menendez në nisje të kësaj seance të komitetit.

Senatori Menendez më tej tha se Kosovës po i bëhet presion, por jo edhe Serbisë.

Kryetari i Komitetit për Punë të Jashtme të Senatit amerikan, Bob Menendez, tha se në dialogun ndërmjet Kosovës dhe Serbisë, jo të gjitha palët po dialogojnë në mirëbesim.

Gjatë seancës së këtij komiteti, Menendez tha se presidenti i Serbisë, Aleksandar Vuçiq, publikisht është deklaruar se nuk do ta respektojë Marrëveshjen e Ohrit, duke thënë se nuk do ta njohë pavarësinë e Kosovës.

Ai shprehu kritika ndaj zyrtarëve amerikanë, duke thënë se i është krijuar përshtypja se Kosovës po i bëhet presion për të krijuar Asociacionin, ndërsa pak presion po i bëhet Beogradit, pak presion po i bëhet një udhëheqësi, që siç u shpreh Senatori, gazeta Nju Jork Times, e karakterizoi si një politikan me lidhje të thella me botën e krimit të organizuar.

Senatori amerikan shtoi se Vuçiq po vazhdon të përqafojë narrativë nacionaliste, sikurse ideja për “Serbinë e Madhe” , ashtu siç presidenti i Rusisë, Vladimir Putin, shtyn përpara idenë për “Rusinë e Madhe”.

E pas seancës dëgjimore në Komisionin për Punë të Jashtme dhe deklaratave të senatorit demokrat ka reaguar presidentja e vendit, Vjosa Osmani.

Ajo ka falënderuar Menendezin për diskutimet në Senat, gjersa theksoi se u hodh dritë mbi zhvillimet në rajon.

“Një falënderim nga zemra për senatorin Bob Menendez  për lidershipin e tij, angazhimin e palodhur dhe angazhimin e palëkundur për demokracinë në Ballkanin Perëndimor.

“Mirënjohës për iniciativën e tij për seancën e sotme të Komisionit për Marrëdhëniet me Jashtë, e cila hodhi një dritë vendimtare mbi zhvillimet në rajon”, ka shkruar tutje Osmani. /Telegrafi/