Kosova ka humbur rastet për të kushtëzuar Serbinë (Video)

Serbia, së shpejti, mund të ndërmarrë një prej hapave më të vështirë për të. Kryeministri i Serbisë, Aleksandër Vuqiq, ka paralajmëruar ndryshime në aktin më të lartë ligjor, Kushtetutës, raporton KTV.

Në rrugën drejt integrimit për në BE, një prej pikave të Kushtetutës që pritet të ndryshojë, është edhe ajo që Kosovën e quan pjesë të Serbisë, formulim ky që gjendet në rreshtat e parë të Kushtetutës.

Një veprim i tillë është i pritshëm për Qeverinë e Kosovës.

Zv/ministri i Integrimeve Evropiane, Ramadan Ilazi përmend edhe obligimin që del nga MSA-ja për Kosovën, që parasheh arritjen e një marrëveshjeje ligjore me Serbinë, që për qëllim ka që dy shtetet, të ushtrojnë të drejtat e tyre në mënyrë të papenguar në procesin integrues.

Megjithatë, Albana Merja nga Grupi për Studime Juridike dhe Politike, thotë se një mundësi e mirë për kushtëzim, është humbur nga Qeveria e Kosovës.

Kapitulli 35, ose i njohur si kapitulli për Kosovën, me lobimin e Qeverisë kosovare do të mund të përfshinte edhe obligimin që Serbia të heqë nga Kushtetuta e saj Kosovën.

Gjithashtu, Merja përmend edhe një skenar tjetër; atë të futjes në Kushtetutën e Serbisë të Asociacionit të Komunave me Shumicë Serbe. Kushtetuta e Serbisë, për herë të fundit është ndryshuar në vitin 2006, pas ndarjes së Malit të Zi nga ky shtet.

Provinca e Kosovës dhe Metohisë, siç i referohen, sipas Kushtetutës, është pjesë integrale e Serbisë.

https://vimeo.com/167914497