Kosova dhe Serbia së bashku në podium – ndodhi në Mal të Zi në sportin e karatesë

Në raste të rralla, sportistët e Kosovës përballen me ata të Serbisë, por edhe më rrallë ndodh që të paraqiten së bashku në podium.  

Megjithatë, në këtë fundjavë në Budvë të Malit të Zi, situata ishte më ndryshe. 

Karateistet e Kosovës dhe ato të Serbisë ndanë vendin e tretë në Kampionatin Ballkanik për seniorë dhe veteranë, i cili përfundoi të dielën.  

Në konkurrencën ekipore, karateistet e Kosovës fituan medalje bronzi, dhe gjatë ceremonisë së shpërndarjes së medaljeve, ata qëndruan në podium së bashku me karateistet e Serbisë, e cila gjithashtu u rendit e treta. 

Vendin e parë e fitoi përfaqësuesja e Bosnjë-Hercegovinës, ndërsa vendin e dytë e zuri Maqedonia e Veriut. 

Kosova në garën ekipore u përfaqësua nga Vlerë Qerimi, Fortesa Orana, Behije Mustafa dhe Elmedina Istogu.  

Ekipi kosovar filloi me një fitore 2-0 ndaj Malit të Zi, por më pas u mposht 2-0 nga Maqedonia e Veriut.  

Në repesazh, karateistet kosovare fituan 2-1 ndaj Rumanisë. 

Nga ana tjetër, Serbia fillimisht humbi 2-1 nga Bosnjë-Hercegovina, por më pas fitoi ndaj Kroacisë.  

Kosova mori medalje dhe në kategoritë individuale, si për femra po ashtu edhe për meshkuj. /Telegrafi/