Konkurrenca jofer, problemi kryesor për bizneset e ndërtimit

Konkurrenca jolojale nga dhjetëra prodhues të pacertifikuar është njëri nga problemet kryesore me të cilin ballafaqohen bizneset në fushën e ndërtimit në Kosovë.

Muhamer Jusufi, drejtor i kompanisë “Renova”, e cila prodhon materiale për suvatim, fasada dhe materiale të tjera ndërtimore, kërkon nga shteti që të themelojë një institucion që bën certifikimin e materialeve ndërtimore, sepse vetëm në këtë mënyrë pastrohet tregu nga konkurrenca jolojale dhe mallrat e patestuara, të cilat e dëmtojnë konsumatorin.

“Konkurrenca jolojale bën tri dëme: Pengon ekonominë e drejtë e cila punon paguan kontribute; i bën dëm tregut; dhe e treta i bën dëm konsumatorit, sepse konsumatori nuk e di që kur e blen një artikull do ta paguajë shumë më shtrenjtë sepse nuk është i rregullt. Unë nuk kërkoj të bëj asgjë shteti, por vetëm të na lejojë të punojmë lirshëm, ta eliminojë konkurrencën jolojale, të punojmë sipas rregullave, sipas standardeve që i kërkon Bashkimi Evropian, sepse vetëm në atë formë mund të na ndihmojë neve dhe ne ta ndihmojmë shtetin që të ecë ekonomikisht përpara”, thotë Jusufi, në një intervistë për Agjencinë e Lajmeve “Ekonomia Online”.

Si sfidë tjetër për bizneset kosovare, ai përmend vonesën e shqyrtimit të lëndëve të bizneseve nëpër gjyqe, që zvarrit me vjet mbledhjen e borxheve. “Problem tjetër i madh është sistemi juridik, që pamundëson inkasimin e mjeteve. Mund të ju them se ne kemi borxhlinj nga viti 2002, kemi lëndë të fituara nga viti 2004 në gjyq dhe asnjëherë nuk janë ekzekutuar. Paramendojeni pas 10 viteve, paraqitet gjyqtari dhe thotë: ‘A mundeni me ma gjet adresën e tij, për me ia marr paret”! /Telegrafi/