Konjufca: Gjykata Speciale u themelua pas presionit të “hatashëm” nga Hashim Thaçi te deputetët e PDK-së

Anëtari i Kryesisë së Lëvizjes Vetëvendosje, Glauk Konjufca ka bërë kritika të forta për klasën politike që ka qeverisur nga paslufta.

Konjufca në “Debat Plus” me Ermal Pandurin në RTV Dukagjini ka thënë se faji për zhvillimet e fundit me Gjykatën Speciale janë të politikës.

“Kjo ka ndodhur pasi që nga çlirimi i Kosovës, UÇK-ja është braktisur nga subjektet politike që kanë qeverisur. Kjo ka ndodhur sidomos pas shpalljes së pavarësisë. Këta politikanë që e kanë qeverisur Kosovën nuk e kanë pasur gajle të mbrojnë qëndrimin e Kosovës karshi Serbisë si një shtet që ka kryer masakra të mëdha”, tha ai, përcjell Telegrafi.

Ish-ministri i Jashtëm në Qeverinë Kurti thotë se nga viti 2011 Thaçi e ka monopolizuar dialogun me Serbinë.

“Tash po aktualizohet ajo që e kanë votuar 80 deputetë në vitin 2015 e që në argumentet e Vetëvendosjes kjo ka qenë e njëanshme. Ne kemi thënë që në çdo luftë ka krime dhe duhet hetuar. Por të thuash se duhet të gjykohen krimet e shqiptarëve, kjo është gabim”.

Konjufca thotë se fatkeqësia është se Gjykata Speciale njëherë dështoi të votohej në Kuvend.

“Edhe një pjesë të deputetëve të PDK-së ishin bindur të mos votohet  Gjykata Speciale. E dimë që kontributin kryesorë për të bindur këta deputetë të votojnë Specialen ishte Thaçi. Gjykata Speciale u votua pas një presioni të hatashëm të Presidentit Thaçi mbi deputetët e PDK-së. Shatë-tetë deputetë që në fillim kishin kundërshtuar, e ndryshua qëndrimin e tyre dhe themeluan Gjykatën Speciale”, tha ndër të tjera Glauk Konjufca./Telegrafi/