Klubi shqiptar Shkumbini nga Peqini ka shtuar në stafin stërvitor një femër, Ilknur Aktas, e cila do të ushtrojë postin e zëvendëstrajneres dhe do të jetë njëkohësisht edhe drejtuese e akademisë.
Shkumbini bën pjesë në Kategorinë e Dytë dhe këtë vit ka ambicie për tu ngjitur më lartë.
“Në kuadër të ngritjes të ekipit, drejtuesit peqinas kanë bërë goditjen e radhës. Një trajnere turke është vënë në dispozicion të stafit teknik dhe do të jetë në krahë të Hetlem Capjes që në sfidën ndaj Pogradecit”.
“Ilknur Aktas më herët ka qënë lojtare në kampionatin e femrave në Turqi, po ashtu pjesë e stafit teknik të Fenerbahces”, thuhet në njoftimin e klubit.
Trajnera Aktas ka folur për aventurën e saj në futbollin shqiptar.
“Me herët kam qenë një lojtare profesioniste në kampionatin turk si dhe trajnere e moshave dhe vajzave tek ekipi Fenerbahces”.
“Që në momentin e parë të ftesës dhe njohjes me projektin e presidentit Ali Kasa në radhët e Shkumbinit pranova të jem pjesë e tij. Për mua do të jetë një eksperiencë e veçantë për ngritjen sërish të këtij ekipi në majat e futbollit shqiptar”, ka thënë Atas. /Telegrafi/
