Recetë pa gluten: Spinaq me hikërr ose oriz në tigan

Kjo recetë e thjeshtë dhe e shijshme përmban vlera ushqyese dhe vitale. Përgatitet shpejtë. Kujdesuni që ta provoni

Bajram Musliu
Shef kuzhine, “Panino”

Hikrra është një burim i mirë i proteinave, fibrave dhe energjisë. Nuk përmban gluten. Tretet lehtë, është përplot me vitamina dhe shumë veti tjera shëruese. Shpesh përdoret edhe si zëvendësim për oriz ose përgatitet si bollgur.

Orizi nuk është vetëm një ushqim i zakonshëm, por edhe shumë i shëndetshëm për trupin. Është i mbushur me nutrientë dhe fibra;  gjithashtu nuk përmban gluten.

Spinaqi është perime e gjelbër e mrekullueshme që i takon grupit të ushqimeve me përbërje të shkëlqyeshme ushqyese, përplot me vitamina, dhe minerale të ndryshme.  (Të gjitha perimet nuk përmbajnë gluten).

Nëse hani ushqime pa gluten, do ta mbroni trupin tuaj nga kjo proteinë, por edhe nga të gjithë aditivët kimikë që gjenden në shumicën e vakteve të gatshme.

Përbërësit:

• vaj ulliri – 5 lugë gjelle
• qepë – 1 kokë
• karota – 2 copë
• spinaq – 400 g, i ngrirë
• hikërr – 100 g (mund të bëhet edhe me oriz)
• kërpudha – 100 g
• supë me perime – 1 kub + 2 gota ujë
• piper i zi – një majë
• nenexhik i egër – 1 lugë gjelle
• kripë – 1/4 lugë çaji ose sipas shijes

Përgatitja:

Nxirrni spinaqin nga frigoriferi që të shkrihet pak.

Vendoseni një tigan të madh në pllakë shporeti në temperaturë të lartë.

Hidhni 5 lugë supe vaj ulliri apo vaj luledielli.

Ndërkohë grini imët një karotë, kërpudhat, qepët dhe hidhni në tigan që të fërgohen.

Pas disa minutave shtoni drejtpërdrejt spinaqin e pashkrirë në tigan me perime.

Përzieni në mënyrë të njëtrajtshme, mundeni ta rrotulloni copat e spinaqit nga të gjitha anët, në mënyrë që të shkrihen më shpejt. Ju merr mjaft kohë derisa të shkrihet.

Lani 100 g hikërr, unë përdor përafërsisht gjysmë filxhani.

Përzieni dhe shtoni hikrrën. Nëse dëshironi, mund të përdorni oriz në vend të hikrrës, por mbase do të duhej më shumë apo më pak ujë.

Hidhni një kub supe me perime.

Hidhni 2 gota ujë ose në përpjesëtim 2:1 me hikrrën.

Përziejini mirë, duke shpresuar që më në fund spinaqi të jetë shkrirë.

Kur hikrra dhe spinaqi fillojnë të ziejnë në tigan, zvogëloni nxehtësinë në nxehtësinë mesatare deri në mesatare të ulët.

Lëreni të ziejë për dhjetë minuta, duke e përzier herë pas here dhe monitoroni nëse hikrra ka thithur ujin.

Hidhni me gishta pak mente të egër, piper të zi sipas shijes, pak kripë dhe përziejini mirë.

Kur uji pothuajse të ketë avulluar, mund ta fikni sobën dhe ta lini hikrrën në tigan që të thithë pjesën tjetër të lëngut për 5-10 minuta të tjera.

Shërbejeni spinaqin me hikërr ose oriz në një tigan me një garniturë me domate të prera në feta ose të tjera sipas shijes tuaj.

Ju bëftë mirë. /Telegrafi/