Një aksident i rëndë komunikacioni ka ndodhur në rrugën Ferizaj – Shtime, si pasojë katër persona kanë ndërruar jetë.
Rastin e ka bërë të ditur zëdhënësi i Policisë për Rajonin e Ferizajt, Kanun Veseli.
Ai ka thënë se në aksident janë përfshirë tri automjete.
“Rreth orës 19:15 Policia Rajonale e Ferizajt ka pranuar një informacion se në aksin rrugor Ferizaj -Shtime, në hyrje të Shtimes, ka ndodhur një aksident komunikacioni ku janë përfshirë tri automjete të udhëtarëve, vetura me targa vendore. Si pasojë e këtij askidenti, 4 persona kanë humbur jetën", ka deklaruar Veseli.
Tutje tha se vdekjen e kanë konfirmuar mjekët në vendin e aksidentit.
Në vendin e ngjarjes kanë dalë ekipe të Emergjencave, po ashtu Njësia e Hetimeve të Komunikacionit Rrugor.
Sipas video-incizimeve të shpërndara në rrjetet sociale, shihen veturat që kanë përfunduar dhjetra metra jashtë aksit rrugor.
Pamjet tregojnë edhe njerëz të shtrirë në tokë si dhe qytetarë përreth veturave të aksidentuara. /Telegrafi/
