Në sheshin e qytetit “Adem Jashari”, u zhvillua Karvani Shëndetësor “PërSHËNDETje”, organizuar nga Agjencia për Kujdesin Shëndetësor (AQH), me financim nga Agjencia Zvicerane për Zhvillim dhe Bashkëpunim (SDC) dhe implementuar nga KOPF, përcjell Telegrafi.
Aktiviteti u mbajt nga ora 11:00 deri në 14:00 dhe kishte për qëllim ofrimin e informacioneve dhe shërbimeve të rëndësishme për shëndetin e qytetarëve.
Gjatë këtij aktiviteti, vullnetarët e AQH ofruan këshilla mbi aktivitetin fizik, duhanin, konsumimin e alkoolit, mbipeshën dhe ushqyerjen e shëndetshme.
Në njërën nga tendat, qytetarët morën shërbime profesionale dhe këshilla nga profesionistët shëndetësorë të Qendrës Kryesore të Mjekësisë Familjare (QKMF).
Interesimi i qytetarëve ishte i kënaqshëm; gjithsej 108 qytetarë vizituan karvanin dhe përfituan shërbimet e ofruara.
Sipas Planit Komunal për Qëndrueshmëri, aktiviteti në të ardhmen do të organizohet nga QKMF me buxhetin e vetanak, duke garantuar vazhdimësinë e këtij programi për promovimin e shëndetit publik. /Telegrafi/
