Kabineti Trump ia huq, fut redaktorin e gazetës në grupin “sekret” në Signal – biseduan për sulmet ushtarake në Jemen

Jeffrey Goldberg, kryeredaktori i The Atlantic, bëri zbulimin befasues të hënën se ekipi i sigurisë kombëtare të presidentit amerikan Donald Trump e shtoi atë në një bisedë sekrete mbi sulmet ushtarake në Jemen.

Këshilltari i Sigurisë Kombëtare, Mike Waltz filloi bisedën në Signal, një aplikacion i koduar i mesazheve, që përfshinte përdorues të identifikuar si zëvendëspresident JD Vance, Sekretarin e Shtetit, Marco Rubio, Sekretarin e Mbrojtjes, Pete Hegseth dhe Drejtorin e Inteligjencës Kombëtare, Tulsi Gabbard.

Një përfaqësues i CIA-s, këshilltari i Trump, Stephen Miller dhe Shefja e Shtabit të Shtëpisë së Bardhë, Susie Wiles, u renditën gjithashtu në grup.

Goldberg, gazetar në Uashington DC, e gjeti veten të shtuar në bisedë, transmeton Telegrafi.

“Duhet të jetë e vetëkuptueshme – por gjithsesi do ta them – se nuk kam qenë kurrë i ftuar në një takim të komitetit të drejtorëve të Shtëpisë së Bardhë dhe se, gjatë raportimit tim shumëvjeçar për çështjet e sigurisë kombëtare, nuk kisha dëgjuar kurrë që një i tillë të mblidhej mbi një aplikacion të mesazheve komerciale”, shkroi ai në The Atlantic.

Historia tronditëse tregon se detajet operacionale u zbuluan padashur. Sekretari i Mbrojtjes, Pete Hegseth, një ish-prezantues i Fox News, tani është nën llupë mbi dështimin e rëndë.

Goldberg vuri në dukje se “Pete Hegseth, Sekretari i Mbrojtjes, më kishte dërguar me mesazh planin e luftës në orën 11:44 të mëngjesit. Bombat filluan të binin në Jemen rreth orës 14:00”.

Trump u tha gazetarëve në Shtëpinë e Bardhë se nuk e kishte parë historinë e Atlantikut: “Nuk di asgjë për të. Unë nuk jam një tifoz i madh i Atlantikut. Është një revistë që po mbaron”.

Kur u pyet për bisedën e Signal, Trump tha: “Nuk mund të ishte shumë efektiv, sepse sulmi ishte shumë efektiv. Mund t’ju them se nuk di asgjë për të. Ju po më tregoni për këtë për herë të parë”.

Goldberg përvijoi përrallën e çuditshme, ku fillimisht shprehu mosbesim për zinxhirin e tekstit, pyeti nëse ishte apo jo e vërtetë dhe më pas kuptoi se ishte e vërtetë kur ‘bombat filluan të binin’.

Ai pranon se “nuk mund të besonte se këshilltari i presidentit për sigurinë kombëtare do të ishte aq i pamatur, sa të përfshinte kryeredaktorin e The Atlantic në diskutime të tilla me zyrtarë të lartë të SHBA-së, deri dhe nënpresidentin”.

Ai u shfaq si ‘JG’ në chat. Është e paqartë se kë donte të shtonte Waltz, por Jamieson Greer, përfaqësuesi tregtar i SHBA-së, ka të njëjtat iniciale, duke ndezur spekulime se ishte menduar të ishte ai.

Goldberg nuk i zbuloi të gjitha informacionet në bisedë, duke përmendur shqetësimet e sigurisë kombëtare. /Telegrafi/

⚡️It’s a bombshell: a journalist was accidentally added to Trump team’s secret chat

Trump’s national security adviser Michael Waltz accidentally added an editor from The Atlantic to a secret Signal group chat where confidential operations were being discussed — including planned… pic.twitter.com/ArwofDcwPq

— NEXTA (@nexta_tv) March 24, 2025