A ju ka ndodhur sikur bota “të jetë rrotulluar rreth jush”? Ka një shpjegim për këtë

A ju ka ndodhur të keni marramendje dhe t’u jetë dukur sikur bota është rrotulluar rreth jush?

E po përjetimi i një momenti të marramendjes nuk është i pazakontë, por kur ndodh mund të jetë i frikshëm, duke ju lënë të ndiheni të paqëndrueshëm ose sikur bota po lëviz rreth jush.

Jo rrallëherë ndodh që ne të gjendemi në këtë situatë dhe duhet të ndalemi derisa të përfundojë e gjitha, shkruan Express.co.uk.

Megjithatë ekzistojnë një sërë shkaqesh të mundshme, pse ndihemi sikur e gjitha bota rrotullohet pranë nesh dhe në këtë artikull i kemi cekur arsyet.

Nxehtësia

Një ndër arsyet që ju bëjnë të ndiheni të trullosur janë temperaturat e nxehta.

“Kur ekspozoheni ndaj temperaturave të nxehta, trupi juaj punon për të rregulluar temperaturën e tij të brendshme përmes djersitjes dhe zgjerimit të enëve të gjakut. Ky proces mund të rezultojë në marramendje”, thotë mjekja, Elise Dallas.

Përveç kësaj, djersitja e tepërt mund të çojë në një çekuilibër të elektroliteve, kur disa nivele të mineraleve në gjakun tuaj bëhen shumë të larta ose shumë të ulëta, duke kontribuar më tej në marramendje.

Ju mund ta parandaloni këtë duke qëndruar të hidratuar, duke shmangur ekspozimin e zgjatur ndaj temperaturave të larta dhe duke bërë pushime në zona të freskëta.

Probleme me presionin e gjakut

Nëse papritur keni marramendje, kjo mund të jetë për shkak se presioni i gjakut ka rënë papritur. Ky lloj rënieje mund të ndodhë për disa arsye.

“Mund të jetë për shkak të humbjes së papritur të gjakut për shkak të një hemorragjie të brendshme ose të jashtme”, thotë Dr Stuart Sanders. “Shkaqe të tjera përfshijnë diçka të quajtur hipotension postural, një gjendje në të cilën presioni i gjakut bie kur ngriheni në këmbë”.

Marramendja mund të jetë gjithashtu një shenjë treguese e të qenit anemik.

Dr Sanders thotë: “Gjendja mund të ndikojë në presionin e gjakut dhe të shkaktojë marramendje kur ndryshoni pozicionin tuaj, nëse keni qenë shtrirë dhe jeni zgjuar në këmbë papritmas, sepse keni më pak qeliza gjaku të liruara për të transportuar oksigjen në kokë dhe në pjesën tjetër të trupit.

“Dhe ankthi mund të shkaktojë gjithashtu një rënie të presionit të gjakut përmes hiperventilimit”.

Për të qenë rehat, duhet të bëni një termin me një mjek për të kontrolluar sistemin tuaj kardiovaskular.

Të përziera gjatë lëvizjes

Nëse udhëtoni me makinë ose me aeroplan dhe e gjeni veten të trullosur, mund të jetë për shkak të të përzierave gjatë udhëtimit.

“Të përzierat gjatë lëvizjes shkaktohen nga një konflikt ndijor midis sistemit vizual dhe sistemit vestibular, i cili kontrollon ekuilibrin dhe orientimin hapësinor”, thotë Dr Dallas.

“Truri merr sinjale të përziera nga këto sisteme, duke çuar në simptoma si marramendje dhe të vjella”.

Përpara se të udhëtoni, zgjidhni një vend me lëvizje minimale, si p.sh. sedilja e përparme e një makine.

Është ajo kohë e muajit

Për gratë, ndryshimet hormonale gjatë ciklit menstrual janë treguar të shkaktojnë marramendje.

Hulumtimet kanë treguar se një rritje e hormoneve të estrogjenit, progesteronit dhe aldosteronit në fazën luteale, mund të shkaktojë mbajtjen e lëngjeve, duke shkaktuar potencialisht marramendje.

Menstruacionet e mundimshme mund të çojnë gjithashtu në anemi të mungesës së hekurit, duke ju bërë që të pësoni marramendje. /Telegrafi/