John Thune zgjidhet udhëheqës i Senatit – nuk ishte i preferuari i Trumpit dhe Muskut

Të kesh qindra miliarda dollarë mund të jetë e mjaftueshme për të blerë një kompani rrjetesh sociale apo edhe të jesh i preferuari i presidentit të sapozgjedhur amerikan, por kjo nuk vlen kur bëhet fjalë edhe për zgjedhjen e kreut të Senatit.

Senatori i Floridës, Rick Scott ishte kandidati i preferuar i Elon Muskut për liderin e shumicës republikane në Senat – dhe, në mënyrë të nënkuptuar, preferenca e Donald Trumpit.

Por, në votimin e fshehtë, republikanët në Senat shpejt zgjodhën një kandidat më tradicional, gjegjësisht senatorin, John Thune nga Dakota e Jugut.

Ai triumfoi në garën e brendshme kundër senatorit nga Teksasi, John Cornyn, në një raund të dytë votimi.

Sipas burimeve të CNN-it, Thune fitoi me 29 vota kundrejt 24 të Cornynit, duke fituar mbështetjen e mjaftueshme për të marrë drejtimin e grupit politik.

Ky sukses për Thune do të thotë shumë për karrierën e tij dhe për drejtimin e Partisë Republikane në Senat. Si pasardhës i Senatorit, Mitch McConnell nga Kentucky, i cili ka mbajtur këtë post për 17 vite dhe ka udhëhequr partinë nëpër sfida të shumta politike, Thune do të përballet me sfida të reja, veçanërisht duke pasur parasysh klimën e ndarë politike në Uashington.

McConnell, një figurë me ndikim të jashtëzakonshëm në politikën amerikane, është i njohur për strategjitë e kujdesshme dhe përvojën e gjatë në bisedimet dypartiake.

Gjatë viteve si udhëheqës, ai ka luajtur një rol kyç në emërimin e gjyqtarëve konservatorë, përfshirë ata të Gjykatës Supreme, dhe në bllokimin e legjislacionit demokrat. Tani, Thune pritet të marrë përgjegjësinë për ta drejtuar grupin drejt zgjedhjeve të ardhshme dhe për të adresuar çështje të ndjeshme për elektoratin konservator.

Pritet që Thune të përqendrohet në forcimin e pozicionit të partisë në çështje kyçe si ekonomia, siguria kombëtare dhe emigracioni, ndërsa përpiqet të ruajë një qasje bashkëpunuese për të arritur qëllime afatgjata.

Fitorja e 63-vjeçarit tregon një ndryshim të mundshëm në strategjinë e udhëheqjes republikane, me fokus te ide të reja dhe ndoshta një stil më të moderuar, ndryshe nga qasja më konservatore e McConnellit.

Ndryshe, senatori i Floridës, Rick Scott ishte kandidati i preferuar i Elon Muskut për liderin e shumicës republikane në Senat – dhe, në mënyrë të nënkuptuar, preferenca e Donald Trumpit. /Telegrafi/