JETA NË KOHË LUFTE

Nga: David Byrne (nga albumi “Fear of Music” i vitit 1979, i grupit Talking Heads)
Përktheu: Agron Shala

Dëgjova për një furgon, të ngarkuar me armë
Të mbushur spicë e gati me u nisë
Dëgjova për ca varreza, atje tej pranë autostradës
Një vend që askush s’e di
Krisma e pushkës, dëgjohet në largësi
Tashmë jam mësuar me të
Kam jetuar në shtëpi luksi, kam jetuar në geto
Kam banuar kudo në këtë qytet

Kjo nuk është gosti, kjo nuk është diskotekë
Kjo nuk është hajgare
S’ka kohë për vallëzim, as për dashuri
S’kam tash kohë për këto gjëra

Dërgoj mesazhin, te pranuesi
Shpresoj të marr përgjigje një ditë
I kam tri pasaporta, disa viza
E ti emrin tim të vërtetë madje s’e di
Lart në një kodër, kamionët po mbushen
Gjithçka është gati për t’u nisur
Fle gjatë ditës, punoj gjatë natës
Mund të mos mbrrij kurrë në shtëpi

Kjo nuk është gosti, kjo nuk është diskotekë
Kjo nuk është hajgare
Ky nuk është Mudd Club e as C.B.G.B*
S’kam tash kohë për këto gjëra

Ke dëgjuar për Hjustonin? Ke dëgjuar për Detroitin?
Ke dëgjuar për Pitsburgun e Pensilvanisë?
Duhet ta dish se nuk duhet të rrish në dritare
Dikush mund të të shohë aty
Kam ca ushqime, ca gjalpë kikiriku
Për të mbijetuar për ca ditë
Por, nuk kam altoparlantë, s’kam as kufje
Nuk kam as disqe për të lëshuar muzikë

Pse të rri në kolegj? Pse të shkoj në shkollë nate?
Do të jem ndryshe këtë herë
S’mund të shkruaj letër, s’mund të dërgoj kartolinë
Nuk mund të shkruaj më asgjë

Kjo nuk është gosti, kjo nuk është diskotekë
Kjo nuk është hajgare
Do të doja të të puthja, do të doja të të përqafoja
S’kam tash kohë për këto gjëra

Probleme në tranzit, kaluam nëpër barrikadë
U shkrimë në turmë
Kemi kompjuterë, po i përgjojmë linjat e telefonit
E di se kjo nuk lejohet
Vishemi si studentë, vishemi si amvise
Ose në kostum e kravatë
I kam ndryshuar flokët, shumë herë deri tash
Nuk e di më se si dukem!
Ti më rrënqeth, ndihem i ndjeshëm
Jemi bërë ekip i mirë
Mos u rraskapit, po vozis unë
Ti duhet të bësh një sy gjumë
Merri udhëzimet, përcilli shenjat
Pastaj duhet ta ndryshosh adresën
Ndoshta nesër, ndoshta ditën tjetër
Çfarëdo që mendon se është më mirë
I dogja të gjitha fletoret, çfarë dobie ka nga to?
S’do të më ndihmojnë të mbijetoj
Gjoksi po më dhemb, po djeg si furrë
Zjarri më mban gjallë
Mundohu të jesh i shëndoshë, me ushtrime fizike
S’duhet të të marrësh asnjë sëmundje
Mundohu të jesh i kujdesshëm, mos rreziko
Bën mirë të kesh kujdes çka flet

* Mudd Club e C.B.G.B, klube të njohura nate të Nju Jorkut në vitet 1970