Jahjaga: Duhet të parandalojmë ikjen e qytetarëve jashtë vendit me plane konkrete

Ish Presidentja e vendit, Atifete Jahjaga gjatë një konference virtuale “Diaspora flet 2020”, organizuar nga Germin Global Albanians Foundation ka folur për emigracionin e qytetarëve të Kosovës, jashtë vendit.

Ajo tha se përderisa vite më parë Shqipëria dhe Kosova ballafaqoheshin me regjime diktatoriale dhe qytetarët emigronin për të pasur një ekzistencë më të mirë, edhe në ditët e  sotme siç tha ajo qytetarët ende janë të pakënaqur dhe zgjidhjen e gjejnë tek emigracioni.

“Është e vërtetë që Kosova, Shqipëria, Maqedonia dhe të gjitha vendet  e Ballkanit Perëndimor po ballafaqohen me emingracionin. Përderisa në Shqipëri kishim regjimin diktatorial të Enver Hoxhës, ndërsa në Kosovë kishim atë të Sllobodan Millosheviqit. Ai që guxonte të fliste hapur apo të shkonte kundër këtij regjimi, dënohej me torturë, burgim apo dhe me vdekje. Ishte dhe kriza për ekzistencë, shkallë e lartë e varfërisë. Shtresa e pasur dhe ajo e varfër që i shtynte kosovarët që të kërkonin një jetë më të mirë. Edhe pas demokratizimit të vendeve tona pakënaqësitë kanë vazhduar të njëjta, ka mungesë të zhvillimit ekonomik… kemi një numër të lartë të qytetarëve që ikin nga vendet tona”, ka thënë ajo.

Jahjaga theksoi se tash është koha që kjo çështje të merret seriozisht, përcjell Telegrafi.

E sa i përket liderëve të vendit se a janë të shqetësuar për këtë problem, ajo tha: “Një pjesë edhe mund të jenë të shqetësuar, por fakeqësisht nuk po e shohim këtë shqetësim, apo se kemi parë deri më tani. Pandemia nga COVID ka tërhequr vëmendjen jo vetëm nga qeveritë tona por nga të gjithë në botë. Duhet të parandalojmë ikjen e qytetarëve tanë me plane konkrete. Duhet të analizojnë të gjitha faktorët shtytëse. Duhet zgjidhje funksionale dhe afatgjate që hyn në funksionë të shteteve tona dhe qytetarëve. Është momenti i fundit për vendime konkrete“, tha ndër të tjera Jahjaga. /Telegrafi/