Jaguar Land Rover do të mbyll përkohësisht dy fabrikat kryesore të veturave

Jaguar Land Rover (JLR) po mbyll përkohësisht dy fabrikat kryesore të veturave për shkak të mungesës së çipave kompjuterikë.

Sipas BBC, përcjell Telegrafi, vështirësitë në prodhuesin më të madh të makinave në Britani, reflektojnë me probleme të ngjashme edhe te prodhuesit e tjerë, duke përfshirë Ford, të cilat janë goditur nga një mungesë globale e çipave.

JLR tha se do të kishte një “periudhë të kufizuar” mbylljeje në qendrat e saj sikurse në Halewood dhe Castle Bromwich, duke filluar nga e hëna.

“Ne kemi rregulluar oraret e prodhimit për automjete të caktuara, që do të thotë se qendrat tona sikurse ajo e Castle Bromwich dhe Halewood, do të operojnë për një periudhë të kufizuar të mos-prodhimit nga e hëna më 26 prill”, tha në një deklaratë JLR në pronësi të Tata.

“Ne jemi duke punuar ngushtë me furnizuesit e prekur për të zgjidhur çështjet dhe për të minimizuar ndikimin në porositë e klientëve kudo që është e mundur”, thuhet më tej në njoftim, duke shtuar se prodhimi në një fabrikë të tretë do të vazhdojë.