Izraeli të hënë publikoi atë që dukej se ishte provë e municionit të Hezbollahut të fshehur nëpër shtëpi – pavarësisht se pretendime të tilla ka pasur më herët nga Izraeli, që kritikohej se po shënjestron shtëpitë nëpër tërë Libanin – ku si pasojë humbën jetën qindra persona dhe mijëra u plagosën.
Në mesin e armëve që Izraeli tha se janë gjetur nëpër shtëpi në Liban, janë raketa me sasi të madhe eksplozivi me të cilat sulmohet Izraeli.
Forcat Mbrojtëse të Izraelit publikuan fotografitë, që shfaqnin raketa me rreze të gjatë veprimi si dhe lansuesit e tyre që ishin fshehur nëpër shtëpitë private në Liban, transmeton Telegrafi.
“Jemi duke shkatërruar atë që Hezbollahu e ndërtoi për 20 vite”, tha ministri izraelit i Mbrojtjes, Yoav Gallant gjatë një vizite që i bëri qendrës komanduese të IDF-së.
Izraeli tashmë ka kryer sulme të shumta mbi 1,600 caqe të Hezbollahut në Liban, kurse zëdhënësi i IDF-së, Daniel Hagari njoftoi se shumica prej sulmeve kishin për qëllim shkatërrimin e armëve të fshehura nëpër shtëpi.
Në mesin e armëve kishte raketa që arrijnë një rreze prej qindra kilometra dhe kokë me afro 1 mijë kilogram eksploziv – që konsiderohen si raketa me rreze të mesme. /Telegrafi/
