Ivanov: Maqedonia ka marrë vendim të pavarur për refugjatët

Në një intervistë për ”Spiegel Online”, kryetari i Maqedonisë, Gjorge Ivanov, ka deklaruar se vendi ka vendosur që të mos bëhet kamp refugjatësh nëse vjen deri te mbyllja e kufijve, prandaj kërkojmë veprim të bashkërenduar, transmeton Telegrafi.

Ivanov thotë se vendimin Maqedonia e ka marrë në mënyrë të pavarur, duke mos pritur ndonjë shenjë nga Brukseli dhe se nëse do të priste vendi për këshilla nga Brukseli, atëherë do të vërshohej nga refugjatët.

Ai nuk e përjashton mundësinë e mbylljes së korridorit ballkanik, por paralajmëron se një hap i tillë do të ketë pasoja të rënda për Maqedoninë, duke theksuar se duhet që të jemi të përgatitur për të gjitha skenaret, sidomos nga momenti kur në Austri do të përmbushet kuota prej 37500 refugjatësh.

Për kryetarin Ivanov, qëndrimi i kancelares gjermane, Angela Merkel, për dyer të hapura, është një gjest mjaft human që duhet të respektohet, ndërkaq gjithnjë insiston që Greqia të jetë pjesëmarrëse në takimet që mbahen për krizën e refugjatëve./Telegrafi/