Kadare për Handken, 20 vite më parë: Nuk e gjej dot ç’grerëz e ka pickuar, me gjithë atë tërbim

Peter Handke është fituesi i çmimit Nobel në Letërsi për vitin 2019.

Ky çmim po kontestohet së shumti madje janë nënshkruar peticione ku i kërkohet akademisë suedeze ta anulojë, pasi Handke njihet si një simpatizant i Sllobodan Millosheviqit dhe mbahet mend për shqiptarët si njeriu që vajtoi për diktatorin e fundit të Ballkanit.

Gjithkush ndër ne mund të ketë pritur një reagim nga shkrimtari ynë Ismail Kadare, që prej vitesh është favorit për Nobelin. Kadare nuk e ka komentuar këtë çmim… Por, ka folur për Handke këtu e 20 vite më parë.

Lexo po ashtu Fituesi i çmimit Nobel, më 2014 kishte fyer shqiptarët e boshnjakët

Ismail Kadare, 20 prill 1999

Televizioni austriak më kërkon një mendim për qëndrimin e Peter Handkes. Në Austri dhe në Gjermani ka fushatë të ashpër kundër tij. Ai qëndrim, ç’është e vërteta, më shumë se zemërim, më ka shkaktuar brengë. Siç ndodh me njerëzit që i njeh. Siç ndodh me sjelljet që ndryjnë brenda një mister.

Shkrimtari më i njohur i Austrisë. Me nënë sllovene. Frankofon. Prej vitesh, duke qenë këshilltar pranë shtëpisë botuese austriake “Residennz Verlag”, është ai që ka propozuar librat e mi për përkthim.

Lexo po ashtu Fillon peticioni online kundër fituesit të Nobelit i cili ka fyer shqiptarët, mijëra nënshkrime në orët e para

E kam njohur para ca vitesh në Paris. Ambasadoja e Austrisë në Francë na ftoi për darkë të dyve, bashkë me gratë. Gruaja e tij franceze është e admirueshme.

Nuk e gjej dot ç’grerëz e ka pickuar. Gjithë ai tërbim kundër shkrimtarëve boshnjakë, gjithë ai zell për të mbrojtur krimet serbe në Bosnjë e pastaj në Kosovë.

Një shkrimtar kroat përpiqet ta shpjegojë me zanafillë frojdiste. Nuk më besohet.

Lexo po ashtu Fituesi i çmimit Nobel për Letërsi, kundërshtar i sulmeve të NATO-s dhe përkrahës i Millosheviqit – vijnë reagimet e para

Ndërkaq, nga darka në ambasadën austriake më kujtohet një frazë e tij. Një frazë disi e veçantë, e thënë me njëfarë pikëllimi: ‘Nuk jam më i njohur si më parë’.

A mund të jetë atje ana e së keqes? Ndoshta, pse jo. /ExLibris/