“Ishim të zhveshur, me vetëm një batanije”, palestinezi tregon se çfarë u ndodhi kur i arrestoi ushtria izraelite – pamjet u bënë virale

Një 22-vjeçar ishte në mesin e dhjetërave burrave të arrestuar në Gazën veriore nga Forcat e Mbrojtjes izraelite (IDF), pamjet e të cilëve u bënë virale.

Këto pamje shkaktuan mjaft reagime, pasi të arrestuarit ishin gjysmë lakuriq, me sy të mbuluar dhe me duar të lidhura pas shpine, transmeton Telegrafi.

Lexo po ashtu Pas arrestimit dhe zhveshjes së palestinezëve, reagojnë Hamasi dhe organizata "Amnesty"

“Ata (IDF) na detyruan të ulemi në mes të rrugës për gati tre orë, pastaj erdhën kamionë, na lidhën duart dhe na mbuluan sytë dhe na çuan në një vend të panjohur”, tha 22-vjeçari për BBC i cili mbeti anonim.

Kur mbërritën në një lokacion, ai tha se ishin përzgjedhur rastësisht për t’u marrë në pyetje dhe u pyetën për marrëdhëniet e tyre me Hamasin.

Djaloshi vjeçar tha se vendi ku u dërguan ai, vëllai dhe pesë kushërinjtë e tij ishte me rërë dhe se ata i kishin lënë pothuajse të zhveshur, por u kishin dhënë një batanije natën.

Lexo po ashtu Symbyllur, duart e lidhura dhe të zhveshur - Izraeli raportohet se ka arrestuar disa militantë të Hamasit

Pas marrjes në pyetje ai u dërgua në një vend të panjohur dhe thjesht i thanë të shkonte në shtëpi, tha ai, duke u kthyer rreth orës 01:40 të mëngjesit.

“Na liruan të gjithëve, përveç babait dhe kushëririt të madh. Babai im punon për organizatën amerikane UNRWA. Nuk e di pse e morën”, tha ai.

“Ne ecëm zbathur nëpër rrugë në errësirë, me rrugët plot me gurë dhe xham”, shtoi ai. /Telegrafi/