Ish-ylli i Arsenalit ‘godet’ Artetën: Nuk më dha mundësinë që e meritova

Ish-mesfushori i Arsenalit, Charlie Patino, ka mbetur i zhgënjyer për faktin se rrugëtimi i tij drejt ekipit të parë është bllokuar.

21-vjeçari i cili ka dalë nga akademia e Arsenalit, dështoi që të bëhet pjesë e formacionit startues të Mikel Artetas, përkundër faktit se ishte cilësuar si një lojtar me të ardhme të madhe në ‘Emirates’.

Reprezentuesi i Anglisë U21 u shit në Spanjë tek Deportivo La Coruna gjatë muajit gusht pasi më herët kishte luajtur në huazim tek Swansea dhe Blackpool në Championship.

Shitja e Patinos erdhi në më pas se një vit pasi Arteta kishte insistuar se adoleshenti ka një rrugë të qartë drejt formacionit titullar tek Arsenali.

“Nuk kam ndonjë pendesë, vetëm ndonjëherë kam dashur që të ndihem më i përfshirë”, ka thënë fillimisht Patino.

“Nuk u ndjeva se kam marrë komunikimin e duhur ose rrugën që doja ose kam ndjerë se e kam merituar, por kjo është jeta”.

Edhe nëse ajo derë nuk është e hapur për ty, ju duhet të përmirësoni veten, t’i dhuroni vetes një mundësi më të mirë për të luajtur në nivele të larta”.

“Arsenali nuk është klubi i vetëm i futbollit në botë. Ka me qindra skuadra që po konkurrojnë në nivelin më të lartë”, përfundoi ai.

Patino kaloi në total nëntë vite tek Arsenali, duke iu bashkuar akademisë së klubit në vitin 2015 pasi ishte transferuar nga Luton Town./Telegrafi/