Ish-kryetari i Bordit të Trustit: Nuk bëhet zgjidhja e problemeve sociale me pronë të huaj për një grusht vota

Ish-kryetari i Bordit të Drejtorëve të Fondit të Kursimeve Pensionale të Kosovës, Ymer Havolli është shprehur kundër një tërheqje tjetër të mjeteve nga Trusti.

Havolli me anë të një reagimi publik drejtuar deputetëve, ka theksuar se nuk duhet të bëhet zgjidhja e problemeve sociale me pronë të huaj, siç e ka quajtur ai, për një grusht vota.

“Trusti nuk duhet të shkatërrohet për një moment me disa vështirësi ekonomike ose për një grusht vota. Do t’i ballafaqoni njerëzit në kohën e pensionit si mos ma keq. Nuk behet zgjidhja e problemeve sociale me pronë të huaj. Deputet, ju jeni përgjegjës të hapni perspektivë, jo të cenoni të drejtën e kursyeseve, gjoja se ju po bëni punë të ‘madhe’. Nesër kur këtë institucion kredibil ta shndërroni sikur të gjitha të tjerat: rruga e vetme mbetet ta sulmoni njeri-tjetrin e të gjeni fajtorin. Ndërkaq ky institucion do të shndërrohet në lëngatë që s’do i gjeni ilaçin”, thuhet në reagimin e Havollit.

Ndryshe, deputeti Bekim Haxhiu në emër të Grupit Parlamentar të PDK-së, më 9 mars pati dorëzuar në Kuvend, Projektligjin për plotësimin dhe ndryshimin e Ligjit për Fondin e Kursimeve Pensionale, i cili do të mundësonte tërheqjen e këtyre mjeteve.

Kujtojmë se një tërheqje e ngjashme deri në 10 për qind është bërë në fund të vitit 2020, pas përkeqësimit të gjendjes financiare të familjeve, për shkak të pandemisë COVID-19. Në raportin e gjashtëmujorit të parë të 2021-së, Trusti kishte njoftuar janë tërhequr rreth 200 milionë euro nga më shumë se 427 mijë kontribuues.

Deputetë nga opozita janë pro lejimit të një tërheqje të re nga Trusti, por pushteti këmbëngul se një gjë e tillë do ta dëmtonte ekonominë e Kosovës. /Telegrafi/