Ish-futbollisti i famshëm i Arsenalit njofton pensionimin nga futbolli

Ish-mesfushori i Arsenalit, Barcelonës dhe Kamerunit, Alex Song, ka njoftuar tërheqjen e tij nga futbolli në moshën 36-vjeçare.

Song e nisi karrierën në akademinë e Bastias në Francë, përpara se të transferohej në Arsenal për 4 milionë euro në vitin 2005 dhe pasi dështoi të lë shenja për Gunners, kamerunasi kaloi gjysmën e dytë të sezonit 2006-07 në huazim te Charlton Athletic.

Gjatë pesë viteve të ardhshme, Song u shndërrua në një lojtar integral për Arsenalin nën drejtimin e Arsene Wenger , duke shënuar 10 gola dhe duke ofruar 23 asistime në 204 ndeshje për klubin, duke shënuar 11 gola në sezonin 2011-12, teksa formoi një lidhje të fortë në fushë me Robin van Persie .

Paraqitjet e Song në sezonin e tij të fundit në Arsenal e panë atë të përfundojë i treti në votim për Futbollistin Afrikan të Vitit 2012 pas Didier Drogba dhe Yaya Toure, teksa ai u shit te Barcelona për 19 milionë euro po atë verë.

Mesfushori shënoi një gol dhe asistoi dy të tjerë në 65 ndeshje për Barcelonën, duke fituar një titull të La Ligës dhe një Superkupë të Spanjës, por ai nuk arriti të bëhej pjesë e formacionit startues në ekipin e mbushur me yje të Barcelonës.

Song më pas u kthye në Ligën Premier tek West Ham United në një marrëveshje huazimi dyvjeçare, duke luajtur në 46 ndeshje, përpara se të bashkohej me Rubin Kazanin si lojtar i lirë në 2016 kur i skadoi kontrata në “Camp Nou”.

Pas një periudhe jo të suksesshme në Rusi, Song kaloi në Zvicër tek ekipi i Sion për një vit e gjysmë, duke u larguar nga klubi në mars të 2020-ës, për t’u rikthyer në Afrikë.

Sa i përket karrierës me kombëtare, Song ka dhuruar katër asistime në 47 ndeshje për Kamerunin, duke përfaqësuar vendin e tij në dy Kupa të Botës dhe në dy Kupa të Kombeve të Afrikës, duke fituar një vend në 11-shen më të mirë në vitin 2008 dhe 2010./Telegrafi/