LAJMI I FUNDIT:

IPKO përkrah projektin për stacionet agrare të fakultetit të Bujqësisë dhe Veterinës

IPKO përkrah projektin për stacionet agrare të fakultetit të Bujqësisë dhe Veterinës

Kompania IPKO në kuadër të projektit “IPKO – Parashikimi Agrologjik”, ka nënshkruar Marrëveshje bashkëpunimi me Fakultetin e Bujqësisë dhe Veterinarisë përmes së cilës është mundësuar instalimi i 16 stacioneve agrare, të cilat do të jenë në funksion të fermerëve të Kosovës, ndërsa një stacion i tillë është instaluar në hapësirat e këtij fakulteti që do të jetë në shfrytëzim të studentëve dhe profesorëve për qëllime studimi.

Stacioni në mënyrë të detajuar do të mas parametrat agrarë si pika e vesës, dendësia e reshjeve, lagështia e fletëve, temperatura e ajrit e të tjera.

Drejtori ekzekutiv i IPKO-së, Robert Erzin, tha se duke pas parasysh zhvillimet e fundit teknologjike, IPKO po fuqizon bizneset në Kosovë.

“Ne si IPKO kemi kënaqësinë të jemi kompani inovative lidere në Kosovë. Ne mund të bashkëpunojmë me Universitetin e Prishtinës, ku dihet se në të ardhmen mund të përdorim këto njohuri. Ne do ta përkrahim Kosovën për një të ardhme më të mirë dhe çfarë është më rëndësi, proceset teknologjike po i ndryshojnë proceset biznisore dhe kjo është një arsye se pse IPKO po ndihmon në fusha të ndryshme në fuqizimin e bizneseve”, tha Erzin.

Rektori i Universitetit të Prishtinës, Marjan Dema, tha se ky projekt do të ndihmojë shumë në hulumtimet praktike të studenteve dhe profesorëve të këtij fakulteti.

“Universiteti i Prishtinës, përkatësisht Fakulteti i Bujqësisë dhe Veterinës me anë të këtij projekti do të bëjë përcjelljen e aktiviteteve agrare, një stacion që na ka munguar shumë, i cili do të ndihmoj shumë në ofrimin e të dhënave për studentët dhe profesorët e fakultetit, në mënyrë që të vazhdojmë me hulumtimet praktike”, tha Dema. /Telegrafi/