Interi është kthyer në krye të tabelës pas fitores prej 2-1 që e realizoi si mysafir i Brescias në kuadër të xhiros së dhjetë në Serie A.
Një fillim më i mirë i Nerazzurrëve, të cilët e zhbllokuan rezultatin në minutën e 23-të, kur një goditje e Lautaro Martinez u devijua dhe u ndal në portën e Enrico Alfonsos.
Me këtë epërsi minimale të mysafirëve, skuadrat shkuan në pushim, duke qenë se në minutat e mbetura të gjysmës së parë nuk pati shumë raste të rrezikshme.
(Foto: Marco Luzzani/Getty Images)
Pjesa e dytë filloi me dy raste të njëpasnjëshme të vendasve, me Mario Balotellin dhe Alfredo Donnarumman që nuk arritën ta kalonin portierin Samir Handanovic.
Porse në minutën e 63-të, Romelu Lukaku shkoi në një solo aksion dhe realizoi gol të bukur me një goditje me të majtën nga jashtë zonës.
(Foto: Marco Luzzani/Getty Images/Guliver)
Me një autogol të Milan Skriniar (76'), Brescia u kthye në lojë dhe në minutat e mbetura tentoi vazhdimisht që ta barazonte rezultatin, por pa sukses.
Kjo fitore e pozicionon Interin në krye të tabelës në Serie A me 25 pikë, dy më shumë se Juventusi që të mërkurën luan kundër Genoas.
Brescia, nga ana tjetër, mbetet në zonën e rrezikut me vetëm shtatë pikë të arkëtuara nga dhjetë ndeshje të zhvilluara. /Telegrafi/
https://www.dailymotion.com/video/x7n8gzr
https://www.dailymotion.com/video/x7n8hda
