Inxhinieria është një fushë e cila ka shtrirje të gjerë dhe gjithëpërfshirëse, ku si qëllim kryesor ka plotësimin e nevojave të njerëzve, përmes aplikimit të metodave dhe teknikave të ndryshme, bazuar në shkencë, teknologji dhe inovacion, dhe si e tillë gëzon një rëndësi të veçantë.

Në Ditën Ndërkombëtare të Grave në Inxhinieri, UBT vlerëson jashtëzakonisht shumë punën, angazhimin dhe përkushtimin e vajzave dhe grave në fushën e inxhinierisë.

Për këtë, UBT ka të zhvilluar Fakultetin Inxhinieri e Ndërtimit dhe Infrastrukturë, Inxhinieri e Energjisë dhe Menaxhment, si dhe Inxhinieri e Agrikulturës dhe Mjedisit, nga ku një pjesë e konsiderueshme e studentëve, janë vajza dhe gra, dhe në të ardhmen ato do të jenë inxhiniere të suksesshme, pas studimeve profesionale në këtë institucion.

Dita Ndërkombëtare e Grave në Inxhinieri e gjen UBT-në me mbi 4000 studente që kanë filluar ndërtimin profesional në fushën e inxhinierisë në këtë institucion, të cilat konkretisht po zhvillojnë aftësitë e tyre në infrastrukturë moderne dhe në laboratorët më të sofistikuar për inxhinieri.

Me këtë rast, rektori i UBT-së, prof.dr Edmond Hajrizi, theksoi se ky sektor është zgjedhje e mirë për të studiuar vajzat dhe gratë, në mënyrë që ato të jenë të barabarta karshi çdo profesioni dhe pune në jetë, teksa inkurajoi vajzat e reja dhe gratë që të fillojnë studimet në fushat e inxhinierisë.

“Hapësira që UBT u ofron grave për t’u zhvilluar profesionalisht në secilën fushë, por me theks të veçantë në fushën e inxhinierisë, është në tjetër nivel, dhe këtë e dëshmon edhe numri i studenteve të cilat studiojnë në fushat e inxhinierisë”, tha rektori Hajrizi.

Shumë vajza e gra të diplomuara tashmë janë punësuar në kompani të ndryshme botërore, janë angazhuar në pozita udhëheqëse dhe si staf akademik e administrativ, por edhe në shumë institucione shtetërore.

UBT çdo vit u bashkohet institucioneve botërore që shënojnë  Ditën Ndërkombëtare të Grave në Inxhinieri me qëllim për të tërhequr vëmendjen e vajzave dhe grave në fushën e inxhinierisë.