IKSHPK apel qytetarëve: Respektojini në përpikëri masat dhe orarin e lëvizjes

Instituti Kombëtar i Shëndetësisë Publike në Kosovë ka kërkuar nga qytetarët që të respektojnë masat mbrojtëse ndaj COVID-19.

IKSHPK ka thënë se qytetarët duhet të respektojnë masat e reja të vendosura nga Qeveria e Kosovës, e që kanë hyrë në fuqi nga data 1 korriku, transmeton Telegrafi.

“Nga 1 korriku me vendim të Qeverisë së Republikës së Kosovës ka filluar aplikimi i një cikli të ri të masave parandaluese ndaj përhapjes së COVID-19 në vendin tonë. Duke qenë se këto masa janë në funksion të ruajtjes dhe mbrojtjes së shëndetit tuaj, të familjes dhe popullatës në tërësi, kërkojmë mirëkuptimin dhe bashkëpunimin tuaj në aplikimin e tyre.

Në ballafaqimin me pandeminë e COVID-19 këto janë masa të ndërmarra dhe të aplikuara edhe nga vendet tjera ku është rishfaqur valë e re dhe të cilat i kanë treguar efektet e tyre.
Prandaj, ju lutemi që t’iu përmbaheni të gjitha masave të shpallura dhe të respektoni në përpikëri masat dhe oraret e lëvizjes të përcaktuara nga Ministria e Shëndetësisë dhe Qeveria e Republikës së Kosovës”, thuhet në njoftimin e IKSHPK-së.

Tutje IKSHPK thekson se bartja e maskave është obligative.

“Ju lutemi që gjithmonë të respektoni masat e distancimit fizik dhe bartjen obligative të maskave, si dhe të mos qëndroni në grumbuj qoftë edhe në oborret e shtëpive tuaja apo para hapësirave tregtare dhe sporteleve, që të mos rrezikoni veten dhe familjet tuaja. Të nderuar familjarë të të moshuarve: Ju lutemi kujdesuni për më të dashurit tuaj të moshuar dhe për nevojat e tyre, duke u siguruar që të mos dalin nga shtëpia pa nevoja të domosdoshme. Gjithashtu ju lutemi që brenda familjes, të përkujdeseni duke respektuar të gjitha masat higjienike ndaj të moshuarve dhe personave me sëmundje kronike”.

IKSHPK thotë se “ të moshuarit dhe personat me sëmundje kronike rekomandohet që nëse duhet domosdoshmërisht të lëvizin, të shfrytëzojnë orët e hershme të mëngjesit. Ju lutemi që t’i përmbaheni të gjitha rekomandimeve të Institutit Kombëtar të Shëndetësisë Publike”.

Në fund të njoftimit, IKSHPK kërkon nga qytetarët të mbajnë maskat dhe distancën fizike për së paku 2 metra.

“Virusi nuk ka këmbë. Mos ia jepni këmbët ju”.

Ndryshe, numri total i rasteve pozitive në Kosovë është 4 mijë 100 raste, 2 mijë e 63 persona janë shëruar kurse janë regjistruar edhe 86 raste të vdekjes./Telegrafi/