IKD kërkon votimin e raportit për verifikimin e mandateve

Në konferencën e Institutit të Kosovës për Drejtësi për ecurinë e seancës konstituive të Kuvendit dhe rrugën që duhet ndjekur, përfaqësuesit e kësaj organizate kanë kërkuar nga deputetët votimin e raportit për verifikimin e kuorumit dhe të mandateve.

Sipas hulumtuesit Melos Kolshi, të gjitha partitë politike duhet të tejkalojnë dallimet dhe interpretimet juridike dhe të miratojnë raportin e Komisionit të Përkohshëm për Verifikimin e Kuorumit dhe Mandateve, raporton “Betimi për Drejtësi”.

“Në këtë situatë, deputetët e zgjedhur në zgjedhjet e 9 shkurtit duhet të reflektojnë mbi rëndësinë e votimit të raportit të Komisionit dhe domosdoshmërinë e konstituimit të Kuvendit”, tha ai.

Sipas Kolshit, paralizimi i Kuvendit nuk mund të jetë alternativë.

Kurse, sipas hulumtuesit Naim Jakaj, në momentin që një person e jep betimin si deputet, ai nuk mund të mbajë më funksionin e anëtarit të Qeverisë, pa marrë parasysh nëse bëhet fjalë për një qeveri të rregullt apo në detyrë.

Jakaj thekson se dorëheqja nga pozitat qeveritare duhet të ndodhë në momentin e dhënies së betimit si deputetë ose menjëherë pas tij, dhe këto dorëheqje të dorëzohen pranë Kryesuesit të seancës konstituive dhe administratës së Kuvendit.

Instituti i Kosovës për Drejtësi e ka prezantuar edhe një shkresë të dorëheqjes e cila, sipas tyre, mund të përdoret për t’u realizuar dorëheqja e Kryeministrit dhe ministrave dhe për t’u konstituuar Kuvendi i Kosovës.

Sipas hulumtuesit Astrit Kolaj, kjo shkresë do ta lehtësojë procesin drejt konstituimit të Kuvendit të Kosovës.

“Për ta lehtësuar procesin drejt konstituimit të Kuvendit të Republikës së Kosovës, IKD ka përgatitur një shkresë model të dorëheqjes, që plotëson kriteret e nevojshme të dorëheqjes e cila kërkohet për t’i hapur rrugë konstituimit të Kuvendit”, tha Kolaj në fund të kësaj konference.