Houthit sërish sulmuan një anije amerikane në Detin e Kuq, SHBA-ja i hakmerret

Grupi Houthi sërish ka kryer sulme drejt anijeve tregtare në Detin e Kuq, duke goditur së fundmi një anije tregtare amerikane.

Ata thonë se anija që ata goditën, operohej nga SHBA-ja, transmeton Telegrafi.

Kompania e sigurisë detare Ambrey tha se një anije që operonte në jug të portit të Jemenit, Aden kishte raportuar një shpërthim në bord, por nuk përmendi emrin e anijes.

Në kundërpërgjigje këtij incidenti, SHBA-ja ka nisur sulme të reja ajrore në Jemen.

Sipas agjencisë së lajmeve Reuters, KOI është një anije tregtare me flamur liberian e operuar nga Oceonix Services me bazë në Mbretërinë e Bashkuar. Flota e së njëjtës kompani përfshin cisternën e naftës Marlin Luanda, e cila u dëmtua nga një raketë të shtunën.

Houthit për javë të tëra kanë pasur në cak anijet tregtare amerikane, britanike dhe izraelite si përgjigje ndaj situatës në Gaza.

Bombardimet ndaj anijeve tregtare kanë filluar që nga 7 tetori kur edhe filloi konflikti mes Hamasit dhe Izraelit.

Si rrjedhojë, vetëm javë më parë SHBA-ja dhe Britania filluan bombardimin e caqeve të Houthit në Jemen. /Telegrafi/