Hoti: Kosovës i mungojnë gjysmë miliard euro investime kapitale

Deputeti i Lidhjes Demokratike të Kosovës (LDK), Avdullah Hoti ka thënë se ekonomisë së vendit tonë i mungojnë rreth 500 milionë euro investime kapitale.

Hoti me anë të një reagimi publik në Facebook, është shprehur se Qeveria Kurti ka performacë të dobët në ekonomi.

“Performancën e dobët në ekonomi të kësaj qeverie e dëshmojnë këto të dhëna. Shpenzimet për çështje ekonomike gjatë vitit 2022 kanë rënë dukshëm krahasuar me vitin 2019, që është viti para pandemisë. Kjo e fakton argumentin se ekonomisë së Kosovës i mungojnë rreth 500 milionë euro investime kapitale, të cilat kanë prodhuar efekte multiplikuese negative në të ardhura dhe rritje ekonomike”, ka shkruar Hoti, përcjell Telegrafi.

Ish-kryeministri i vendit ka shtuar se matur në periudha tremujore, ekonomia e Kosovës ka pasur trend rënës.

Lexo po ashtu ​Rukiqi për mungesën e investimeve kapitale: Asnjë projekt nga Qeveria Kurti që do të ndikonte në rritjen ekonomike të vendit

“Kjo është arsyeja që rritja ekonomike, matur në periudha tremujore, ka qenë me trend rënës nga tremujori i dytë i vitit 2021, që është koha kur kjo qeveri ka nisur punën. Dorëheqja është shpëtim për stabilitetin ekonomik dhe politik të vendit”, ka përfunduar ai. /Telegrafi/