Heshtje vjen dështimit të projektit për Brezovicën (Video)

Edhe një ditë pas zyrtarizimit të dështimit të Projektit për Zhvillimin e Qendrës Turistike Brezovica, ende nuk ka asnjë koment nga konzorciumi i udhëhequr nga francezët.

Përfaqësuesi i këtij konzorciumi, Lorik Haxhiu, ka refuzuar të deklarohet lidhur me dështimin e projektit, raporton KTV.

E, Ministrja e Tregtisë dhe e Industrisë, Hymete Bajrami, ka thënë se projekti ka dështuar, pasi konzorciumi nuk ka mundur t’i sigurojë 163 milionë euro për fazën e parë të investimeve në kompleksin turistik “Brezovica”. Ajo ka mohuar zërat se Serbia ka mundur të ndikojë tek investitorët, duke thënë se Kosova është vend sovran.

Pa dhënë më shumë detaje, Bajrami ka njoftuar se janë duke shikuar për investitorë të tjerë, duke thënë se për hapat e radhës do të njoftoheni gjatë ditëve në vijim.

Ndërkohë, Berim Ramosaj, Koordinator në Forumin për Politika Zhvillimore, ka thënë se dështimi i projektit është një humbje për Kosovën, edhe pse për të nuk ishte befasi.

Fajtor kryesor për dështimin e ka bërë Qeverinë e Kosovës, por nuk e ka përjashtuar as mundësinë e ndikimit të Serbisë pasi, sipas tij, shtetit serb i konvenon një Kosovë e pazhvilluar dhe në gjendje “status-quo”.

Ndërsa, në Lëvizjen Vetëvendosje, thonë se kjo duhet të shërbejë si mundësi për të diskutuar modelin e zhvillimit ekonomik në vend.

http://koha.net/?id=27&l=119203