Hamiti: Çështjet kombëtare nuk duhet të jenë pjesë e prijësve fetarë

Profesori i Fakultetit të Studimeve Islame, Xhabir Hamiti, ka thënë se edukata fetare, e cila rregullohet përmes një komisioni, përmes një grupi të ekspertëve, nuk do të ishte negative për vendin tonë.

“Edukata fetare është një pasuri dhe një kulturë”, ka thënë ai në emisionin Info Magazine.

Hamiti foli edhe për hoxhallarët, disa prej të cilëve po nxisin urrejtje në shoqërinë tonë.

“Zakonisht këta kanë ra pre e këtyre devijime që janë përdorur në emër të feve. Në Kosovë, Shqipëri dhe Ballkan, ka qenë një dendësi e madhe e organizatave joqeveritare, të cilat në një mënyrë euforike, duke mos bërë dallime mes kulturës dhe festë, që t’i praktikojnë edhe tek ne”, ka thënë ai. “Rrjetet sociale ua kanë mundësuar atyre që të plasojnë mendimet e tyre të pakontrolluara, të paredaktuara, njerëz që s’kanë kurrfarë njohurie”.

Hamiti ndër të tjerash tha se çështje madhore kombëtare, nuk duhet të jenë pjesë e prijësve fetarë të sotëm të cilët përmes deklaratave shkaktojnë huti.

“Le t’ia lëmë historianëve ose pedagogëve që ata të sjellin një vendim kush ka qenë kombëtar e kush jo”, thotë ai. “Është çështje e akademisë, nuk është çështje e jona, se s’jemi ekspert të kësaj fushe”. /Klan Kosova/